1 Jothesalonika 2 - KITAWO MALEŊ

Tic pa Paulo i Thesalonika

¹ Kole wiwegi wiŋeyo, wutmere, nike wendo mawan riwin k'otho nono.

² Wiŋeyo paka oyido otiek timo wan marac gi yeto wan i Filipi mafodi wakibino Thesalonika. Kad'ameno Were mawan omiyo wan miseni ma tito riwin Wac Manyen Maber ma wok bonge, kada piem obedo madit.

³ Kole wac ma wakelo ma tiŋo win malo k'ocungo kwoŋ komo kosa atoŋa marac, odoko bende wakitemo wondo moro.

⁴ Kucel, ndir je waluwo paka Were yenyo watim, kwoŋbedo go ofoyo wan aka oketho Wac Manyen Maber i cingi wan. Wakitem kisangala ji, to wamito kisangala Were ayino, ma temo atoŋa ma cuny wan.

⁵ Kole wiŋeyo maber ni wakibino bongi win gi luwo ma dwoŋo win, kosa gi wac ma umo woro; aka Were obedo jakony mawan i gime!

⁶ Wakitemo rango pak bongi nyatoro, kada bongi win kosa bongi joman,

⁷ kada bedi nitie gim'oyido di wayenyo kwoŋ win g'arom paka jomoor pa Kristo. To wabedo moth munyo wanitie gi win, pa dhako ma kuro nyithindho pere maber swa.

⁸ Ro mar ma wamaro gine win am'omiyo wabedo gi kisangala ma poko ye gi win, ki nyaka Wac Manyen Maber ma wok bongi Were kende, to kiri kwo mawan won, rupiri onwaŋo wibedo riwan ji ma welo swa!

⁹ Adieri jowoti wan, wipoyo paka watiyo aka wafamba! Watiyo wor g'odieceŋ ŋey wakiri wabedi gima pek riwin munyo wafoyo Wac Manyen Maber ma wok bongi Were.

¹⁰ Wibedo jokony mawan, paka Were bende, ni kite ma wanyutho win ma wiyeyo Kristo oyido olony aka otire m'ongoye komo.

¹¹ Wiŋeyo nike watero dhano je kwoŋ win paka ba nyathi tero nyithindho pere.

¹² Waruma win gi miyo win miseni, wadiyo cuny win, aka wakwayo win nike kwo mewin wobedi ma sangala Were, ma lwoŋo win donjo i Ker kodi i dwoŋ pere.

¹³ Aka ro wac me bende, ndelo je waketho Were walwa. Munyo wakelo riwin mikwenda pa Were, wiwinjo aka wijolo, ki paka mikwenda pa dhano to mikwenda pa Were, m'obedo ameno adieri. Aka kole Were tiyo maber i dier win jom'oyeyo.

¹⁴ Wutmere, wibedo paka kitipin pa jom'oyeyo i Kristo ma Yuda je, rupiri wibende wicandere i lweny m'owok bongi ji mewin wegi, paka jo bende jocandere kwoŋ Joyuda wadi jo,

¹⁵ ma joneko Rwoth Yesu kodi jotuci wac pajo wegi, aka jolwenyo gi wan. Jokisangala Were be! Jolwenyo gi ji je!

¹⁶ Jotemo kiri juko wan fonjo Jopath mikwenda ma d'okelo rijo both. Me a reco m'opoŋ ma gike ma jotimo. Aka onyo pama keme pa Were ojok otundo rijo.

¹⁷ To wan, jowotan, munyo oloki wan pa nyithindho kic, t'ipoko wan gi win hongo macek i del, to ki i cuny, wakeŋ win swa aka onwaŋo wayenyo gi maro mathoth neno win kendo!

¹⁸ Aka onwaŋo wayenyo dwoko bongi win. Iy'adieri an Paulo, atemo kiri dwoko dikweth, to Sitan cego riwan royo.

¹⁹ Aka onyo geno mawan, kisangala mawan, kodi atoŋa mawan ma yumirok obedi aŋo ruwaŋ Rwodhiwan Yesu ka go odwoko?

²⁰ Adieri wiŋati wikibedo pakirok mawan kodi kisangala mawan?