1 Jokorintho 6 - KITAWO MALEŊ

Ketho wac kwoŋ jokristo jowoti win

¹ Ka ŋat'acel kwoŋ win nitie gi piem g'omin, go nyalo nedi kidho bongi jothumi banja pa joma bu Were, kama di weyi ji pa Were wegi jowocowi wac no?

² Wikuya ni ji pa Were jobino thumo ri piny banja? To ka wiŋati wilathumo ri piny banja, thumo banjin mathindho nyalo dhiero win nedi?

³ Wikuya ni wabino thumo banjin ri jomalaika? K'inen ameno, banjin ma kwo me d'odhier wan thumo nedi?

⁴ Am'omiyo ka wac ma cale ameno obino, raŋo witero woko both ji ma jokristo jocayo ni ama jowocowi?

⁵ Meno awaco ma kwoto wiy win! Ongoye kada ŋat'acel i dier win mariek manyalo cowo dhawirok manitie i dier jom'oyeyo!

⁶ Kucel dhano kidho i kapido g'omin to miyo joma bu Were ama jothumo banja rijo.

⁷ Iy'adieri, k'inen witero kiŋunyaŋunya mewin i ka winjo banjin ma piny ka, nyutho nike wipodho swa. Thimba di wikidiyo cuny win ka moro otimo riwin marac? Raŋo di wikidiyo cuny win ka nyatoro omayo win gimoro?

⁸ Kucel wiwegi witimo reco ri jowoti win, mayirok gigipiny, kiri apa jom'oyeyo jowot win won!

⁹ Wikuya ni joreco jokibino donjo i Ker pa Were? Moro wokiri wowondi win: Ongoye jokidakana, kosa jolami cal makicar, kosa mon ma jotana delkwoŋ jo i timo giwickwot, kosa jotimi cot, kosa joma timo kidakana cwo gi cwo wadi gin aka mon bende gi mon wadi gin,

¹⁰ kosa jokwo, kosa jomero, kosa jonyeki nyingi wadi gin, kosa jomitan ma jokwalo, ma bino donjo i Ker pa Were. Aka megi kwoŋ win oyido wibedo ameno.

¹¹ To onyo otiek lonyo win kwoŋ gimarac: Okethi win i tiro gi Were i nyingi Rwoth Yesu Kristo gi meni pa Cuny Maleŋ pa Were mawan.

Or win delkwoŋ win ma miyo Were dwoŋ

¹² Nyatoro nyalo waco ni, “Kole oyeyan timo gimoro je.” Ey, to bero kinyal bedo i kisi gimoro. Abende anyalo waco ni oyeyan timo gimoro je, to akibino yeyo gimoro wolokan ŋeca pere.

¹³ Ŋati man bino waco ni, “Kole cemo obedo ri ici, aka ici bende ri cemo.” Ey, to Were bino reyo woko gino je. Delkwoŋ dhano k'otimi ri kidakana to ri Rwoth ayin; aka Rwoth bende bedo ri del.

¹⁴ Were ocerino Rwoth kwoŋ jom'otho, aka go bende bino cerino wan i meni pere.

¹⁵ Wikuya ni delkwoŋ win obedo adec ma delkwoŋ Kristo? Onyo akwany adec ma delkwoŋ Kristo aloki delkwoŋ dhano ma tana delkwoŋe i timo giwickwot? Ki nyalere!

¹⁶ Kosa miti wikuya ni ŋata riwo delkwoŋe kodi apa ŋata cale ameno lokere acel gine? Ndiko waco ni, “Jario jobino lokere del acel.”

¹⁷ Aka ŋata bedo iy'acel gi Rwoth lokere acel i cuny kodi go.

¹⁸ Weyere win gi kidakana! Gimarac man ma dhano timo kimaki delkwoŋe to ŋata timo cot timo gimarac kwoŋ delkwoŋe won.

¹⁹ Ikuya ni delkwoŋin obedo Ot pa Cuny Maleŋ ma bedo i in, ma Were omiyin? Ikibedo aperin won, to apa Were.

²⁰ Go onyewo win gi welo ma malo. Am'omiyo or win delkwoŋ win ma miyo Were dwoŋ.