1 Jokorintho 16 - KITAWO MALEŊ

Mic ma konyo ji pa Were

¹ Onyo wac ma mako kwoŋ pesa m'iripo coko ma konyo ji pa Were i Yuda: Tim win gim'awaco ri kitipa pa jom'oyeyo ma Galasia timo.

² I ndelo marapena je ma tic, i Sabiti, ŋat'acelecele kwoŋ win ripo ketho gicen pesa moro, ma go nyalo ketho paka lim pere nitie, aka wokan kicutho, ŋey wongoye kendo coko pesa moro k'abino.

³ K'abino, aladhiro ji moro ma wifoyo kiti jo, gi balwa ma nyutho jo, jowoteri mic mewin Yerusalem.

⁴ Ka yenyere ran kidho, bende jonyalo woth kodan.

Can pa Paulo

⁵ Alabino bongi win k'atieko wok yu Makedonia, rupiri ayiko luwo yu Makedonia.

⁶ Miti abino cowo hongo moro gi win, ma kono kada hongo ma cwir ma pe ŋic'iye piny no gipi, ŋey winyal konyan i medirok gi woth paran kamoro je m'anokidh'iye kendo,

⁷ rupiri akimiti neno win nyaka i hongo macek won akadha. Ageno cowo hongo m'oromo ye gi win ka Rwoth oyeyo.

⁸ T'abino bedo Efeso ka tundo ndelo ma Pentekost.

⁹ Aka royo onyo oyawere ran malac ma tic, kada joma piemo kodan jomore.

¹⁰ To ka Timothe obino bongi win, yikere win ma miyo go ŋeyo ni wijolo go maber, rupiri go bende tiyo ri Rwoth paka an.

¹¹ Wongoye ŋata wocayi go, to wikonyi go womedere gi woth pere i siem, aka nyaka go bino dwoko bongan: Kole wan kodi jom'oyeyo je wakuro neno go.

¹² Onyo, i wac ma mako kwoŋ Apolo, atieko temo dhiro go limo win kodi jom'oyeyo man, to go won fodi k'oneno ni ber wobin pama. To ka go olimo hongo, aka obin.

Wac macowe

¹³ Bedi win waŋ win, cungi win matek i yeyo, bedi win miseni, bedi win gi meni.

¹⁴ Gimoro je ma witimo, tim win gi mar.

¹⁵ Aka wutmera, wiŋeyo kwoŋ Sitefano gi peco pere paka jobedo jom'otelo wirok i yeyo i Gris, aka jomiyere tic ri ji maleŋ pa Were. Akwayo win wutmera,

¹⁶ yeyo tel pa ji ma cale ameno, kodi apa joman je ma jotiyo matek gi jo.

¹⁷ Asangala gi bino pa Sitefano, Fotinato, kodi Akayiko rupiri jobino ka mewin,

¹⁸ aka joyomo cunyan kiri gi cuny win bende. Joli win ji ma pameno.

¹⁹ Kitipa pa jom'oyeyo ma iy'adec ma Asia jodhiro riwin moth; Akwila kodi Pirisila, kodi kitipa pa jom'oyeyo ma romo i ot pajo jodhiro riwin moth m'oasere i Rwoth.

²⁰ Jom'oyeyo ma ka je jodhiro riwin moth. Mothere win akor i leŋo.

²¹ An Paulo, awon andiko moth me gi cingan.

²² Ŋata k'omaro Rwoth Yesu Kristo, wonwaŋi kwoŋ! Maranatha (Rwodhiwan biye!)

²³ Nema pa Rwoth Yesu wobedi kodi win.

²⁴ Mar paran wobedi kodi wijoje i Kristo Yesu.