1 Jokorintho 15 - KITAWO MALEŊ

Cerino pa Kristo

¹ Onyo wutmera, amito poyo win, Wac Manyen Maber m'atieko fonjo win, ma wijolo, ma yeyo mewin onyo ocung'iye matek.

² Wac Manyen Maber ma afonjo win no ama bino botho win ka wicwir'iye matek, kak'ameno, meno wiyeyo gim'ongoye.

³ Acwayo riwin gim'abende ajolo, aka meno a gimadwoŋ swa: Nike Kristo otho ri reco mawan paka Ndiko Maleŋ waco;

⁴ nike oyiki go t'icerino go i kwo ceŋ mar'adek, paka Ndiko Maleŋ waco;

⁵ nike go omenyere ri Petero, aka rumacen bende ri jomoor apar g'ario je.

⁶ Rumacen go omenyere ri jofonjirok pere ma kalo miya abic kiromo, aka mathoth kwoŋ jo fodi jokwo, kada joman jotieko nindo.

⁷ Gikenyo go omenyere ri Yakobo, gi rumacen ri jomoor pere je.

⁸ Macowe, go omenyere ran bende, an ma acalo pa ŋat'onywol apoya.

⁹ Ato abedo jamoor m'oasa thin kwoŋ jomoor je, ma kiripi kad'alwoŋa ni jamoor, rupiri alwenyo gi kitipa pa jom'oyeyo Were.

¹⁰ To ro nema pa Were, abedo ŋat'abedo, aka nema ma go otimo ran k'obedo ma bukony. Kucel, atieko tiyo matek loyo jomoor man je, kada k'obedo tic paran won, to nema pa Were ma nikodan ama tiyo.

¹¹ Am'omiyo, kad'obedo an kosa jo ama jotito riwin, to me a gima wijoje wiyeyo.

Cerino mawan

¹² Onyo k'itito ni Kristo ocerino kwoŋ jom'otho, jomegi kwoŋ win odoko jowaco nedi ni cerino pa jom'otho ongoye?

¹³ K'inen cerino ongoye, nyutho ni kere Kristo k'ocerino be;

¹⁴ aka ka Kristo k'ocerino kwoŋ jom'otho, meno kere fonji mawan ongoye kony aka yeyo mewin bende ongoye kony.

¹⁵ Medo kwoŋ meno, nyutho ni wacwoko dhok Were, rupiri wawaco nike go ocerino Kristo kwoŋ jom'otho ma to kere k'ocerino go, k'inen obedo adieri ni jom'otho jokicerino.

¹⁶ Ato ka jom'otho kicerino jo, meno nyutho ni kiri Kristo bende k'ocerino.

¹⁷ Aka ka Kristo k'ocerino, meno nyutho ni kere yeyo mewin bukony aka fodi wirwenyo i reco mewin.

¹⁸ Aka jom'onwaŋo joyeyo ma jotieko ywomere i Kristo kere bende jotieko rwenyo woko ayin.

¹⁹ Ka wageno Kristo nyaka i kwo ma pama i piny ka kende meno kere waŋati wajolifol maloyo joman je i piny gipi.

²⁰ To iy'adieri otiek cerino Kristo kwoŋ jom'otho, paka gima nyak m'onyak marapena kwoŋ jom'otho ma bende jobino cerino.

²¹ Ato paka tho owok kwoŋ dhano acel, i royo acel cerino kwoŋ jom'otho bende onyo wok kwoŋ ŋat'acel.

²² Paka ji je jotho ro nywolirok kwoŋ Adam, ameno bende apaka ibino cerino ji je i Kristo.

²³ To kisi dhano cerino gi hongo pere; Kristo marapena ri ji je; nyaka joma jobedo apa Kristo bende jobino luwo i ndir ma bino pere.

²⁴ Gikenyo, gike bino tundo; Kristo bino reyo woko adhum je, gi dwoŋ, kodi meni je, to kodo ker ri Were Bawan.

²⁵ Ato Kristo ripo dhumo cuka Were okethi jokwor je i par tiende.

²⁶ Jakwor m'ibino reyo macowe a tho.

²⁷ Kole ndiko waco ni, “Were oketho gimoro je i par tiende.” Ato, ka owaci ni, “Gimoro je okethi i par tiende.” Meno kirwaki Were bend'iye, rupiri go am'oketho gimoro je iy'adhum pa Kristo.

²⁸ Aka k'otiek ketho gimoro je i adhum pa Kristo, gikenyo go won, paka Wod Were, bende bino donjo i adhum pa Were, m'oketho gimoro je i par tiende; ŋey Were wodhum kisi gimoro je.

²⁹ Ka k'obedo ameno, to raŋo jomegi jolimo batisimo ka waŋ jom'otho? K'obedo adieri paka jowaco ni jom'otho jokicerino, raŋo ma ji limo batisimo ka waŋ jom'otho?

³⁰ To wan, raŋo ma wayeyo candirok hongo je?

³¹ Wutmera, a thenere gi tho ndelo je, to pakirok man gine ro win i kwo mawan i Kristo Yesu Rwodhiwan ama miyan atuco gime.

³² K'inen alwenyo g'ogwaŋe mager ma Efeso, nyaka ro mbusa paka dhano, bero aŋo ma alim'iye? Ka jom'otho kicerino paka jowaco, kere onyo, “Weyi wacem wamedhi rupiri dikin walatho.”

³³ Moro wokiri womiŋi win: Kole kitipa marac nyeko kite maber.

³⁴ Dwoki win i paro mewin m'otire wiwey timo reco. Awaco gime ma kwoto wiy win; ato jomegi kwoŋ win jokuya Were.

Cal pa del ma cerino

³⁵ To nyatoro moro nyalo penjo ni, “Icerino jom'otho nedi? Jobino dwoko gi del ma cale aŋo?”

³⁶ In dhano mamiŋ! Kole kodhi m'ipidho i lowo kinyal twi gi kwo ka kutho k'otho.

³⁷ K'ipidho gimoro, ikipidhi gima twi gikululu, to nyaka kodhi mere ayin paka nyigi ŋano, kosa kiti kodhi man,

³⁸ Were miyo kodhi no kiti cal pere ma won oyenyo; go miyo kisi kodhi acel acele kiti cal pere ma ripo gine.

³⁹ Aka gigipiny makwo kibedi nger acel; ji jonitie gi del ma kite acel, ogwaŋe del ma kite man, winyin del ma kite man, rec bende del ma kite man.

⁴⁰ Aka nitie cal manyapolo kodi manyapiny bende; onyo kiti ŋono pa gigipiny manyapolo obedo man, aka kiti ŋono pa gigipiny manyapiny bende obedo nger man.

⁴¹ Waŋceŋ nitie gi lero mere, dwe gi lero man, aka micalin bende gi lero man: Odoko kiri i dier micalin je nitie lero m'opekere.

⁴² Meno bende apaka bino bedo ka jom'otho jocerino. Dhano m'iyiko obedo gima top; del ma go lacerino gine bino bedo gima kitopi.

⁴³ Iyiko del manyap, to bino cerino man gi meni.

⁴⁴ Iyiko paka del manyapiny, to bino cerino paka del manyacuny. K'inen del manyapiny nitie, meno del manyacuny bende ripo bedo.

⁴⁵ Am'omiyo ndiko waco ni, “Adam, dhano marapena olimo kwo.” To Adam macowe obedo Cuny ma miyo kwo.

⁴⁶ Del manyacuny ama kitel, to manyapiny ama kutho telo, aka nyaka gima nyacuny luwo.

⁴⁷ Adam marapena owok i piny, dhano ma fukefuke; Adam mar'ario wok i polo.

⁴⁸ Paka ŋati m'ocwey wok i fukefuke cale, apaka ji je ma piny ka bende jocale; aka paka ŋata wok i polo cale, bende apaka joma ni polo jocale.

⁴⁹ Aka paka waruko cal pa ŋat'ocwey gi fukefuke, ameno bende apaka wabino ruko cal pa ŋati m'owok i polo.

⁵⁰ Me a gim'awaco, wutmera: Del kodi remo kinyal donjo i Ker pa Were; aka gima tho bende kinyal donjo i kwo makitho ka kutho k'owiro cal.

⁵¹ Weyi awaci riwin nyaliŋliŋ me: Wajoje wak'otho, to wabino wire i yoto,

⁵² ma piyo paka diemo waŋ, k'ogoy gwara macowe. Ato gwara bino ywak, to jom'otho jocerino gi del ma kilatho kendo, aka wajoje wabino wire.

⁵³ Ato del ma tho me ripo ruko del makitho aka ŋey kwo ma rumo piyo me wolokere makirum.

⁵⁴ Am'omiyo k'otiek rwako ri gima tho ruk makitho, aka gima kiyindira otiek rwako rigo ruk ma yindira, nyaka ndiko bino tundo i kare ma waco ni, “Meni pa tho otiek loyo woko kicutho.”

⁵⁵ “Tho, nikune paka doko inoloy lweny? Tho, nikune kwir perin ma lunga?”

⁵⁶ Ato kwir pa tho ma lunga wok i gimarac, aka gimarac nwaŋo meni pere i Cik.

⁵⁷ To Were wofoy ma miyo wan loyo lweny i Yesu Kristo Rwodhiwan!

⁵⁸ Am'omiyo, wutmera, cungi win matek ma wicwiny, ma wikiyengere. Yindini win ndir je i tic mewin ri Rwoth, rupiri wiŋeyo ni ongoye gima witimo i tic mewin ri Rwoth ma bu kemba.