Zekaria 7 - KITAWO MALEŊ Catholic

Rwoth kwero riyo kec m'ongoye adieri

¹ I oro mar'aŋwen ma dhum pa Kere Dario, k'aŋwen ma dwe mar'abuŋwen, dwe ma Kislev, wac pa Rwoth obino ri Zekaria.

² Munyo oyido Bethel ooro Sareza kodi Regem Melek kodi cwo pajo, kwayo ruwaŋ Rwoth,

³ kodi penjo jocway ri Were i wi migam m'oyido jonitie i Ot pa Rwoth pa lwak jolweny kodi jotuci wac Were ni, “Anyalo ywak kodi lokirok maleŋ i dwe mar'abic paka oyido atimo ma oro kweth pama?”

⁴ Wac pa Rwoth pa lwak jolweny obino ran ka waco ama:

⁵ Luw gi ji je ma piny kodi jocway ri Were i wi migam k'iwaco ni, “Ma oro piero ario, wiriyo kec to wiywak i dwe mar'abic kodi i dwe mar'abirio, i oro ario me, adieri obedo ran ma wiriy'iye kec?

⁶ Kosa ka wicemo to wimedho, k'obedo riwin wegi?

⁷ K'obedo gi wac pa Rwoth m'oluwo luwo i cingi jotuci wac Were ma cango, ma Yerusalem obed'iye m'okwe, kodi tindi madongo m'othoko go, yupiny ma Kanan kodi Sefela?”

⁸ Wac pa Rwoth obino ri Zekaria ka waco ama:

⁹ Rwoth pa lwak jolweny waco ama: Thum banja g'adieri, nyuthi wor kodi ŋono kisi dhano ri nyawote.

¹⁰ Citho, nyithindho kic, japath, kosa jacandi, ikir'idiy, kosa timo can marac ri nyawotin i cunyin.

¹¹ To jokwero winjo, aka joyengo badi gin gi wictek, aka ithi gin obedo mapek ma jok'onyalo winjo.

¹² Jotweyo cuny jo ma jok'owinjo cik kodi wac ma Rwoth pa lwak jolweny odhiro gi cuny pere luwo i cingi jotuci wac Were ma cango. Riameno keme madwoŋ obino wok bongi Rwoth pa lwak jolweny.

¹³ Aka paka go olwoŋo, to jok'onyalo winjo, ameno munyo jolwoŋo, go k'onyalo winjo, Rwoth pa lwak jolweny waco.

¹⁴ Akedho jo g'asur i dier nonin je m'oyido fodi jokuya. Ameno lowo ma joweyo odoŋ m'ojwangere, m'ongoye ŋata oluw'iye kosa dwok'iye, lowo m'oyido ber to jwangere.