Zekaria 2 - KITAWO MALEŊ Catholic

Menyirok ma thol ma kipima

¹ Atiŋo waŋan malo t'aŋiyo, aka neni, jacwo m'otiŋo thol ma kipima i cinge.

² Kenyo apenjo go ni, “Ikadho kune?” Go odwokan ni, “Akadho kipima Yerusalem ŋeyo dwoŋo mere kodi boro mere.”

³ Aka neni, malaika m'oyido luwo kodan obino malo, aka malaika man owok romo gi go,

⁴ aka owaco rigo ni, “Ŋweci, iluw gi jayac no, aka iwaci ni, ‘Yerusalem ladoŋ paka adec m'othangere, ro ji kodi ogwaŋe ma jonitie i iye.’

⁵ Kole An, Rwoth awaco ni alabedo rigo cel ma kor ot thoko, aka alabedo dwoŋ i go.”

Ilwoŋo jotwec dok peco

⁶ Awi, awi, ringi woko i lowo ma yumalo, Rwoth waco, kole paka koyin aŋwen ma polo, atieko kedhin woko, Rwoth waco.

⁷ Awi, awi, Zayon kwale, in m'ibedo gi nyar Babilon.

⁸ Kole Rwoth pa lwak jolweny waco ama; ri dwoŋ ma go ooran bongi nonin ma jonyaga win, kole ŋat'ogeyin, meno ogeyo tongi waŋan.

⁹ Kole ee acegin yengo cingan kwoŋ jo, aka ŋecin pajo jolakinyaga jo, aka wilaŋeyo nike Rwoth pa lwak jolweny ooran.

¹⁰ Koki ri kisangala aka fore, Awi nyar Zayon, kole neni, ee acegin bino aka alabedo i dier in, Rwoth waco.

¹¹ Nonin kweth jolariwere gi Rwoth i ndelo no, aka jolabedo ji paran, aka alabedo i dier in, aka ilaŋeyo nike Rwoth pa lwak jolweny ooran bongin.

¹² Rwoth lalunjo Yuda paka adec pere i lowo maleŋ, aka go layero Yerusalem kendo.

¹³ Kudere, win ji je, ruwaŋ Rwoth, kole go oay wok i kabedo pere maleŋ.