Zekaria 13 - KITAWO MALEŊ Catholic

¹ I ndelo no labedo waŋ pi m'ilayawo ri ot pa Daudi kodi ji ma jobedo i Yerusalem lonyo jo kwoŋ reco kodi koco.

² I ndelo no, Rwoth pa lwak jolweny waco, alakwanyo woko nyingi calin wok i piny, aka kilapoyo jo kendo. Alamiyo jotuci wac were kodi cuny m'ocido ngoye woko i piny.

³ Aka ka nyatoro omenyere kendo paka jatuci wac were, bamere kodi min ma jonywolo go jolawaco rigo ni, “Ikilakwo, kole iluwo twodo i nyingi Rwoth.” Bamere kodi min ma jonywolo go jolacwowo go.

⁴ I ndelo no kisi jatuci wac Were labedo giwickwot ro menyirok pere ka tuco wac Were. Jolaruko law ma yer ŋey jowotwodi.

⁵ Go lawaco ni, “Akibedo jatuci wac Were, abedo jafur; kole dhano otana an wok i soye paran.”

⁶ Nyatoro lapenjo go ni, “Me adholin aŋo i dieŋeyin?” Go ladwoko ni, “Alimo adholin no i ot pa merin paran.”

Or ma neko jakwath rombo pa Were

⁷ Cew, Awi abor, kwoŋ jakwath rombo paran, kwoŋ jacwo ma cungo cegin kodan, Rwoth pa lwak jolweny waco. Neki Jakwath rombo, ŋey rombo jowokedhere, aka alawiro cingan kwoŋ mathindho mere.

⁸ I piny gibe, Rwoth waco, ario ma wi adek ilaŋado to jorere, aka acel wiy adek ilaweyo makwo.

⁹ Alaketho adec mar'adek i mac, alathodho paka ithodho feza, aka alatemo jo paka itemo zahabu. Jolalwoŋo nyingan, aka aladwoko jo. Alawaco ni, Jobedo ji paran, aka jolawaco ni, Rwoth obedo Were paran.