Zekaria 12 - KITAWO MALEŊ Catholic

Both pa Yerusalem ma yuwaŋe

¹ Me wac pa Rwoth kwoŋ Isiraili, Rwoth waco, go m'oyaro polo to cako piny aka otimo cuny dhano i go.

² Neni, acegin loko Yerusalem kikopo ma kirin ri ji je thoko, ka jothoki mako Yuda gi Yerusalem.

³ I ndelo no alaloko Yerusalem tele mapek ri nonin je; ma jono ma jotiŋ jolalimo litho swa; aka nonin je jolariwere kanyacel monjo go.

⁴ I ndelo no, Rwoth pa lwak jolweny waco, alagoyo kisi kayina gi kirin, aka jogwey mere gi neko. To kwoŋ ot pa Yuda alayawo waŋan, aka alagoyo kisi kayina gi waŋtho.

⁵ Jodhum ma Yuda jolawaco iy'adundo pajo ni, “Ji ma jobedo i Yerusalem jonitie gi meni i Rwoth pa lwak jolweny bedo Were pajo.”

⁶ I ndelo no alamiyo jodhum ma Yuda bedo paka dak mac i dier yen, paka tome mac i kanja, aka jolarere woko racuc kodi racam nonin je, kareno Yerusalem fodi ladoŋ i kabedo mere, i Yerusalem.

⁷ Rwoth latelo botho wemin ma Yuda, ŋey dwoŋ ma ot pa Daudi kodi dwoŋ pa ji ma jobedo i Yerusalem wokiri woloyi dwoŋ pa Yuda.

⁸ I ndelo no Rwoth lakikwonga ji ma jobedo i Yerusalem ŋey ŋata nyap kwoŋ jo i ndelo no wocale paka Daudi; aka ot pa Daudi labedo paka Were, paka malaika pa Rwoth ruwaŋ jo.

⁹ Aka i ndelo no alarango reyo woko nonin je ma jobin monjo Yerusalem.

Ndelo ma ywak

¹⁰ Alakonjo kwoŋ ot pa Daudi kodi ji ma jobedo i Yerusalem, cuny ma wor kodi ma kwayo, aka jolanenan ŋata jocwowo to joywak paka ŋata ywako wode acel g'acel. Jolabedo gi geregere rigo, paka ŋata ywako kayo pere.

¹¹ I ndelo no ywak labedo madwoŋ i Yerusalem paka ywak ri Hadad Rimon i milelo ma Megido.

¹² Piny laywak, kisi peco won laywak; peco pa Daudi won kende, gi mon pajo kakendi gin; peco pa Nathan won kende, gi mon pajo kakendi gin;

¹³ peco ma ot pa Levi won kende, gi mon pajo kakendi gin, peco pa Simey won kende, gi mon pajo kakendi gin,

¹⁴ pecin je ma jodoŋ, kisi peco won kende, kodi mon pajo kakendi gin.