Zekaria 11 - KITAWO MALEŊ Catholic

Podho pa jombaka

¹ Yaw thigin perin, Awi Lebanon, ŋey mac wowaŋ woko yen sida perin!

² Goy ndur, Awi yen lwiyo, kole yen sida jotieko podho, kole yen matek jotieko podho! Goy ndur, Awi olwa ma Basan, kole otoŋ piny lul m'oyukino!

³ Winji derino ma ywak pa jokwath rombo, kole onyeki woko ŋono pajo! Winji kihola pa simbwore, kole onyeki woko yukino ma Yordan!

Jokwath rombo ario

⁴ Rwoth Were paran waco ama: Bedi jakwath rombo pa mwendi ma joripo athumo.

⁵ Jono ma jonyewo jo jothumo to jokadho m'ongoye gir'acula, aka jono ma jotana jo jowaco ni, “Rwoth wopak, atieko ŋaŋo; aka jokwath pajo jongoye gi wor kwoŋ jo.”

⁶ “Kole akilamako wor gi ji ma piny me kendo, Rwoth waco. To neni, alaweyo kisi dhano i cingi jager pere, kodi i cingi kere pere, jolaŋinyo piny, aka ongoye ŋata bino botho wok i cingi jo.”

⁷ Akwayo mwendi ma ripo athumo, riameno jolimo litho. Akwanyo ludhe ario, acel alwoŋo ni Nema, aka man alwoŋo ni Riwirok; t'akwayo mwendi.

⁸ Asika woko jokwath rombo adek i dwe acel, akibedo moth gi jo, aka bende jodakan.

⁹ Ameno awaco ni, “Akilabedo jakwath rombo mewin, ma tho weyi wotho, m'orey woko weyi worere, aka weyi ma joboth jowocami delkwoŋ wadi jo.

¹⁰ Akwanyo luth paran ma Nema, aturo woko, ma turo woko cikirok m'atimo gi ji je.

¹¹ I ndelo no, maluth otur'iye, mwendi m'oyido jolimo litho, m'oyido joŋiyan, joŋeyo nike oyido obedo wac pa Rwoth.

¹² Awaco rijo ni, ka ber ruwaŋ win, miyan win cul paran, to ka be, weyi win.” Ameno jopima cul paran feza piero adek.

¹³ Rwoth owaco ran ni, “Bol i kakan ri jacwey degi, cul ma dicwe ma joculan. Ameno atero feza piero adek, t'abolo i Ot pa Rwoth.

¹⁴ Aturo luth mar'ario, ma Riwirok, ma turo wat i dier Yuda kodi Isiraili.”

¹⁵ Rwoth owaco ran kendo ni, “Kwany iloki aperin, gigipiny pa jakwath rombo mamiŋ.

¹⁶ Kole ee, acegin tiŋo malo jakwath rombo i piny, ma kidew kwoŋ m'ireyo woko, k'orangi ma jokedhere, k'ocangi ma jotur, kosa k'opidhi ma joboth. To go lacamo woko riŋo pa ma jocwe, aka layeco woko lwet jo.”

¹⁷ “Kidamba ri jakwath rombo ma bukony, ma jwango mwendi! Abor lacwowo cinge kodi waŋe maracuc! Cinge lathwo kicutho, waŋe maracuc latho kicutho!”