Zekaria 10 - KITAWO MALEŊ Catholic

Rwoth ciko gonyo ji pere

¹ Kway win koth wok bongi Rwoth, i hongo ma cwir, Rwoth timo pondeponde ma kelo koth, go miyo ji koth, miyo kisi ndelo pa dhano twi cemo.

² Kole cal joluwo kidakana, jothieth joneno twodo, jolek jowaco lek ma twodo, jomiyo diyo cuny manono. Riameno ji jolera paka rombo, jonitie i litho kwoŋbedo jakwath rombo ongoye.

³ Nge paran oliel kwoŋ jokwath, aka amiyo wot diegi gir'acula, kole Rwoth pa lwak jolweny owendo ri mwendi pere, ot pa Yuda, aka lamiyo jo bedo paka kayina ma dwoŋ pere i lweny.

⁴ Kwoŋ jo owok tele ma sonda, kwoŋ jo owok ludhe, kwoŋ jo owok asere ma lweny, kwoŋ jo owok jadhum.

⁵ Jolabedo paka cwo ma jomeni i lweny, ma jonyono jokwor i royin, jolalweny kwoŋbedo Rwoth nitie gi jo, aka jolasewo wi jogwey kayinin.

⁶ Alaloko matek ot pa Yuda kodi ot pa Yozefu, alabotho jo, t'adwoko jo, anitie gi wor rijo, paŋini oyido akijwango jo, An, Rwoth Were pajo, aladwoko jo.

⁷ Efrayim labedo matek paka cwo ma jomeni, cuny jo lakisangala paka gi vini. Nyithindho pajo jolaneno to josangala, cuny jo lafore i Rwoth.

⁸ Alalwiyo rijo, t'acoko jo, kole atieko botho jo, aka jolabedo kweth paka con.

⁹ Makada nende anokedhi jo i dier nonin, to jolapoyan i piny mabor, jolakwo gi nyithindho pajo to jodwoko.

¹⁰ Aladwoko jo wok i lowo ma Misir, alacoko jo wok Asiria; alakelo jo i lowo ma Giliad kodi i Lebanon, cuka ongoye kabedo rijo.

¹¹ Jolaluwo i nam gi litho, jolagoyo asur ma nam, lutho ma Nayil lagik piny, noro pa Asiria lapodho, aka luth ma dhum pa Misir laeye woko.

¹² Alamiyo jo bedo matek i Rwoth, aka jolawoth i nyingi go. Rwoth waco.