Zefania 2 - KITAWO MALEŊ Catholic

Thumo banja ri jokwor pa Isiraili

¹ Cokere win kanyacel, cokere win. Awi nono ma jongoye giwickwot,

² mafodi gim'owacere k'otundo, paka cuŋ ma thon, mafodi nge m'ogaga pa Rwoth k'obino kwoŋ win, mafodi ndelo ma keme pa Rwoth k'obino kwoŋ win.

³ Rangi win Rwoth, win jomamwol je ma i piny, jono je ma joworo or pere. Tim win gim'otire, mwole win ruwaŋ Rwoth; poy kono winobothi i ndelo ma keme pa Rwoth.

Kidamba ri nonin ma jothoko Isiraili

⁴ Kole ilajwango Gaza, Asikelon ladoŋ gunda, ji jolariemo woko Asdod odieceŋ par, aka ilafudho woko Ekiron.

⁵ Kidamba ri ji ma jobedo i thengi nam, piny pa Jokereth! Wac pa Rwoth luwo kwoŋ win, Awi Kanan, lowo pa Jofilistia; aka alareyo woko win cuka ongoye ŋat'odoŋ bedo i win.

⁶ Thengi nam labedo kakwath, kanindo ri jokwath, kodi sidwol mwendi.

⁷ Thengi nam labedo lim, ri jono ma jodoŋ i ot pa Yuda, labedo kakwath pajo, i udi ma Asikelon, jolanind'iye othieno. Kole Rwoth Were pajo lawendo rijo, to dwoko rijo silwany.

⁸ Atieko winjo yet pa Mowab, kodi aŋala pa Amon, nger ma jotieko yeto ji paran, to jodele kwoŋ adec pajo.

⁹ Riameno, paka akwo, Rwoth pa lwak jolweny waco, Were pa Isiraili, Mowab lacale paka Sodom, aka Amon paka Gomora, lowo m'omore gi kayongo kodi buce cumbi, ladoŋ gunda kicutho. Ji paran ma jodoŋ jolakinyaga jo, to jolunjo jo.

¹⁰ Me labedo cul pajo ro noro pajo, kwoŋbedo joyeto to jotimo gigipiny madongo, kwoŋ ji pa Rwoth pa lwak jolweny.

¹¹ Rwoth lakelo lworo kwoŋ jo. Go lasewo werin je ma piny kisi nono lalamo go, kisi acel i piny pere won.

¹² Win bende Joethopiya, ilaneko win g'abor paran.

¹³ Rwoth larieyo cinge yumalo, to reyo woko Asiria, aka go laloko Ninivi gunda, adec m'othwo paka thim.

¹⁴ Mwendi jolanindo i dier go, ogwaŋe je ma piny, tula ma thim kodi kinapupu je jolanindo kenyo, jolakihola i dirisa, agak lanindo i dhiot, kole ilanyeko woko mbawo mere ma yath sida.

¹⁵ Me tindi madwoŋ m'oyodere, m'obedo i siem, to waco i cunye ni, obedo an, kole an kende, kucel otieko lokere gunda, kaywomirok p'ogwaŋe. Kisi ŋata luwo kabonge, lalwiyo to teŋo cinge.