Zefania 1 - KITAWO MALEŊ Catholic

Ndelo pa Rwoth ma thumo banja

¹ Me wac pa Rwoth m'obino ri Zefania wod Kus, aka, nyakwar Gedalia, Amaria, kodi Hezekia, i hongo ma wod Amon, Kere Yosia dhumo i Yuda.

² Alakisika woko kicutho kisi gimoro, wok i piny, Rwoth waco.

³ Alakisika woko ji kodi ogwaŋe, alakisika woko winyin ma polo, kodi rec ma nam. Gima miyo jokidakana cer, aka alakisika woko ji, wok i piny, Rwoth waco.

⁴ Alarieyo cingan kwoŋ Yuda, kodi kwoŋ jono ma jobedo i Yerusalem, aka alareyo woko wok i kabedo me kisi Bal m'odoŋ je, jocway ri were i wi migam makicar, kodi jocway ri Were i wigam ma jowire lamo cal.

⁵ Rwoth lareyo jono je ma jolamo Lwak ma i polo wi ot, jono ma jokule piny to jokwoŋere i nyingi Rwoth, kodi jono ma jokwoŋere i nyingi were pajo Molek.

⁶ Rwoth lareyo woko jono je ma jowiro ŋey gin rigo, jono je ma jokirangi go kosa kwayo go wotel jo.

⁷ Bedi liŋ ruwaŋ Rwoth Were! Kole ndelo pa Rwoth orikere, Rwoth otieko yiko cowirok, go otieko loko wendo pere maleŋ.

⁸ Aka i ndelo ma cowirok pa Rwoth, alamiyo jodhum kodi wot kere gir'acula, kodi jono je ma joruko nangin pa jopath.

⁹ I ndelo no bende alamiyo gir'acula, ri jono ma jopor wi kituti, aka jopoŋo ot pa jadwoŋ pajo, g'akaka kodi banirok.

¹⁰ Kole bino bedo i ndelo no, Rwoth waco, ywak ma litho lawinjere, wok i Waŋkac ma Rec i Yerusalem. Ndur lawinjere iy'adec manyen ma tindi madwoŋ, kodi derino ma ŋinyirok madwoŋ wok wi tendere.

¹¹ Goy win ndur, awi ji ma jobedo iy'adec ma yupiny ma tindi madwoŋ, kole ilareyo woko ji ma Kanan je, kwoŋbedo ilareyo woko jomitan.

¹² Aka labedo i hongo no m'abino rango Yerusalem gi tala, alamiyo gir'acula ri ji ma wegi jogenere, jono ma joparo i cuny gin ni, Rwoth kilatimo bero kosa raco.

¹³ Ilakinyaga woko lim pajo, aka udi pajo ladoŋ gunda. Jolageto udi, to jok'onind'iye, jolapidho ndelo vini, to jok'omadhi vini mere.

¹⁴ Ndelo madwoŋ pa Rwoth orikere, cegin aka bino mayot, derino ma ndelo pa Rwoth kec, kiri jolweny ma jomiseni loyo joywak m'ongoye geno.

¹⁵ Ndelo no labedo ndelo ma keme, ndelo ma litho kodi nge, ndelo ma kisika kodi rerok, ndelo ma mudho kodi kumo, ndelo ma colo kodi mudho mapek.

¹⁶ Ndelo ma gwara kodi ywak ma lweny, kwoŋ tindin madongo m'otinda, kodi kwoŋ acurcur m'oŋawere.

¹⁷ Alakelo litho ri ji, aka jolawotho paka ji ma waŋ gin tho, kwoŋbedo jotimo reco kwoŋ Rwoth, remo pajo laoy paka fukefuke, aka nyagir iy gin paka woyo.

¹⁸ Feza pajo kosa zahabu pajo, kilabotho jo, i ndelo ma keme pa Rwoth, i mac ma nyeko pere, piny gipi larere woko, gi mac ma nge pere. Go laketho gike abwap ri ji je ma jobedo i piny.