Zabuli 92 - KITAWO MALEŊ Catholic

Wer ma pak

¹ Obedo gimaber foyo Rwoth, wero pak ri nyingin, Awi Jamalo Swa,

² tuco mar perin makiwire odikin, gi timo adieri perin wor,

³ gi wer ma milowe g'adungu, gi wer ma tongol.

⁴ Kole tim perin ma meni miyan kisangala, awero gi forok ro gim'itieko timo.

⁵ Tim perin nga dwoŋ, Awi Rwoth, Paro perin nga luth!

⁶ Me gima nyaka dhano kinyal ŋeyo, ŋatamiŋ kinyal niaŋ,

⁷ ni, makada nende jokidakana jodongi paka dudi, aka joma timo komo joyindira, kucel ibino reyo jo kicutho.

⁸ Me kwoŋbedo in, Awi Rwoth, idwoŋ loyo cil gi cil.

⁹ Kole jokwor perin je, Awi Rwoth, jobino tho, aka ibino kikengila jokidakana je.

¹⁰ Imiyan bedo matek paka thwon mager, imiyan silwany gi kisangala.

¹¹ Waŋan otieko neno podho pa jokwor paran, ithan owinjo ywak pa jokidakana.

¹² Joma timo gim'otire jobino kiyindira paka yen thith, jobino dongo paka yen sida ma Lebanon.

¹³ Jocale yen m'opidhi i Ot pa Rwoth, ma joyindira i Ot pa Were,

¹⁴ ma jonyak olemo kiri i tiyo, aka jobedo manyaboke pendi kendo matek.

¹⁵ Me nyutho ni Rwoth timo tiro, ni ongoye komo kwoŋ tele paran.