Zabuli 90 - KITAWO MALEŊ Catholic

Kitawo mar'aŋwen Zab 90—106 Were tek, ji jonyap

¹ Awi Rwoth, ibedo kabedo mawan i luse je.

² Mafodi ikicweyo gote kosa icweyo piny gibe, oyido ibedo Were makwo cil gi cil, aka ibino bedo Were cil gi cil.

³ Iwaco riwan gik gim'oyido wabedo, imiyo wan gik i fukefuke.

⁴ Kole oro gana ruwaŋin cal ndelo acel, cal nyoro ka, kosa sawa macek wor.

⁵ Iyweyo wan woko paka mikula pi, wacal lek ma hongo macek. Wacal dudi ma twi odikin,

⁶ madongo to thiwo, aka thwo to tho othieno.

⁷ Warere gi nge perin, wabwok gi keme perin.

⁸ Ithango reco mawan ruwaŋin, reco mawan manyaliŋliŋ kam'inyalo neno jo.

⁹ Kwo mawan lokere macek gi nge perin, rumo woko paka mwoŋo.

¹⁰ Wanitie gi oro piero abirio kende, oro piero aboro ka watek; kucel jokelo riwan teko gi rem, kwo rumo, aka wakinen kendo.

¹¹ Ŋa m'otieko winjo meni ma nge perin? Ŋa m'oŋeyo lworo ma keme perin nyalo kelo?

¹² Ameno fonji wan kwano ndelo mawan, ŋey wanyal lokirok mariek.

¹³ Inomedere mako nge kiri keraŋo? Tim ŋono, Awi Rwoth ri ŋecin perin!

¹⁴ Poŋi wan gi mar perin makiwire kisi odikin, ŋey wanyal wer to wasangala i kwo mawan je.

¹⁵ Miy wan kisangala madit paka kumo m'imiyo wan, i oro mawan je ma litho.

¹⁶ Weyi ŋecin perin jowoneni tim perin ma meni, weyi nyikway wan jowoneni dwoŋ gi meni perin.

¹⁷ Weyi bero pa Rwoth, Were mawan, wobedi gi wan i kisi gima watimo.