Zabuli 9 - KITAWO MALEŊ Catholic

Foyo ri tiro pa Were

¹ Alafoyin Rwoth, gi cunyan je. Alawaco gir'aura je m'itieko timo.

² Alawero gi kisangala rin. Alapako nyingin, Were ma jameni je.

³ K'ineno, jokwor paran jogik cen jopodho piny to jotho.

⁴ Ithumo banja gi tiro m'ongoye banirok, aka ithumo banja i thenge paran.

⁵ Ithumo banja ri piny je, aka ireyo jokidakana, ireyo woko nyingi jo kicutho.

⁶ Jokwor jorere woko to josika, ireyo woko tindin pajo madongo, aka kipoy jo kendo.

⁷ To Rwoth obedo kere cil gi cil, go otieko oketho kom pere ma thumo banja.

⁸ Rwoth thumo banja ri piny gi tiro, go thumo banja ri ji marom.

⁹ Rwoth obedo kapondo ri ji m'idiyo, kapondo maber i hongo ma teko.

¹⁰ Jono ma joŋeyin, Rwoth, joketho geno pajo i in, kole ikijwangi ŋata bino bongin.

¹¹ Wer win wer ma pak ri Rwoth, ma dhumo i Zayon! Waci ri kisi piny gima go timo!

¹² Were poyo jono ma jocandere, wiye kiwil gi ywak pajo, aka miyo gir'acula ri jono ma jotimo rijo raco.

¹³ Maki kodan wor, Awi Rwoth! Neni candirok ma jokwor paran jokelo ran! Bothan kwoŋ tho, Awi Rwoth,

¹⁴ ŋey acungi ruwaŋ ji ma Yerusalem, aka awaci gigipiny je ma miyan, apakin. Alafore kwoŋbedo ibothan.

¹⁵ Ji jokunyo bur aka jopodh'iye, jomoko i bwo pajo wegi.

¹⁶ Rwoth omenyere thumo banja gi tiro, aka jokidakana jomoko gi tim pajo wegi.

¹⁷ Jokidakana je joripo tho, kiri gi nonin je ma jokwero Were.

¹⁸ Ibino poyo ji ma bu gimoro noknok, geno pa jocandi kilarere cil gi cil.

¹⁹ Ay, Awi Rwoth! Ikir'iwey ji jowocayin! Keli piny gibe ruwaŋin, aka ithumi rijo banja.

²⁰ Miy jo bedo gi lworo, Awi Rwoth, weyi nonin jowoŋey ni jobedo nyaka ji!