Zabuli 71 - KITAWO MALEŊ Catholic

Kwayo pa ŋat'otegino

¹ I in, Awi Rwoth, anwaŋo kapondo; ikir'iwey abedi i wickwot!

² I tiro perin gonyan aka ibothan; Bothan kwoŋbedo itimo gim'otire!

³ Bedi ran tele ma pondo, cel matek, ma bothan, kole iŋat'ibedo tele paran, aka kapondo paran.

⁴ Bothan Awi Were paran, wok i cingi jokidakana, wok kwoŋ amidha pa ŋata butiro gi jagero.

⁵ Kole in, Awi Rwoth, iŋat'ibedo geno paran, geno paran, Awi Rwoth, wok i thino paran.

⁶ Atieko goŋere kwoŋin wok i nywolirok paran; iŋat'iwodhan wok i iy mama, Alapakin noknok.

⁷ Atieko bedo gir'anena ri ji kweth, to iŋat'ibedo kapondo paran matek.

⁸ Dhokan opoŋ pak perin, gi dwoŋ perin odieceŋ gipi.

⁹ Ikir'ibolan woko i hongo ma tiyo, ikir'ijwangan ka meni paran olacere.

¹⁰ Kole jokwor paran joluwo kwoŋan, jono ma jorango kwo paran jotimo can kanyacel.

¹¹ Jowaco ni, “Were otieko jwango go; wariem wamaki, kole ongoye ŋat'obothi go”.

¹² Awi Were, ikir'ibedi bor kodan; Awi Were paran, kwakere ma konyan.

¹³ Weyi jomisegey paran wokethi jo i wickwot to jorere; giwickwot gi kigayagaya weyi woum joma jorango miyan litho.

¹⁴ To alabedo gi geno noknok, aka kucel alamedo pakin swa.

¹⁵ Dhokan latuco tim perin m'otire, tim perin ma both ndelo je, kole jomore loyo m'aŋeyo.

¹⁶ Alabino i tim ma meni pa Rwoth Were, alapako tim perin m'otire, aperin kende.

¹⁷ Awi Were, itieko fonjan wok i thino paran, aka fodi atuco tim perin ma gir'aura.

¹⁸ Ameno kiri i tegino gi twi lwar, Awi Were, ikir'ijwangan, cuka anotuci meni perin, ri luse je m'obin yuwaŋe. Meni perin

¹⁹ gi tim perin m'otire, Awi Were tundo i polo, In m'itieko timo gigipiny madongo, Awi Were, ŋa ma cale in?

²⁰ Itieko miyan neno teko ma kiwacere gi candirok, t'iladwoko meni paran kendo; ilafudhan kendo wok i pendi piny.

²¹ Iŋat'ila medo dwoŋ paran; t'iyomo cunyan kendo.

²² Alapakin gi tongol ro adieri perin, Awi Were paran; alawero pak rin gi tongol, a ŋataleŋ pa Isiraili.

²³ Dhokan laloko gi kisangala, munyo awero pak rin; gi cunyan bende m'itieko botho.

²⁴ Aka lewan latuco kony perin m'otire ndelo je, kole ji m'oyido jorango miyan litho, okedhi jo i wickwot gi kikengila.