Zabuli 7 - KITAWO MALEŊ Catholic

Kwayo ri tiro

¹ Abino pondo i in Awi Rwoth, Were paran, bothan aka igonyan kwoŋ jono ma jorieman,

² kosa jobino tiŋan woko paka simbwor, to joteran kam'ongoy'iye ŋat'obothan, aka jobino yecan mathindho thindho.

^3-4 Awi Rwoth Were paran, k'inen atimo gimarac ri nyatoro, k'inen acamo sereko ri mere, kosa atimo akaka ri jakwor paran m'akiŋeyo, k'inen atimo gimoro kwoŋ gigipiny me,

⁵ weyi jokwor paran joworieman aka jowomakan, weyi jowotoŋan aka jonekan, to joweyan ma bu kwo i fukefuke!

⁶ Awi Rwoth, ay i nge perin, Ay malo kwoŋ nge pa jokwor paran, cew, Awi Were paran. Tiro am'imito,

⁷ ameno coki ji je thokin, aka idhumi jo gi kom perin.

⁸ Rwoth thumo banja ri ji je, thum ran banja Rwoth, cungo kwoŋ bero paran, iŋeyo ni abu banja.

⁹ Ibedo Were ma timo gim'otire, aka ithumo banja cungo kwoŋ paro mawan gi awanya mawan. Juki kidakana pa jomarac, aka imiy jomaber kemba.

¹⁰ Were kwonga an, go botho jono ma jowinjo go.

¹¹ Were thumo banja gi tiro, aka thumo banja ri jokidakana.

¹² K'inen nyatoro k'owire kwoŋ kidakana pere, Were otieko pako abor pere, otieko luŋo to ciko asere pere,

¹³ otieko yiko gilweny pere ma neki, aka ociko asere pere maliel.

¹⁴ Neni, jakidakana paro kwoŋ gimarac, cano teko aka timo gi twodo.

¹⁵ Go ciko bwo ri joman, aka won mok'iye kendo.

¹⁶ Gimarac pajo wegi kelo kwoŋ jo gir'acula, aka akaka pajo miyo jo litho.

¹⁷ Abino foyo Rwoth ro tiro pere, t'apako Rwoth, Were madwoŋ loyo werin je.