Zabuli 68 - KITAWO MALEŊ Catholic

Wer pa piny ma loyo

¹ Weyi Were woay malo, weyi jokwor pere jowokedhere; weyi jono ma jodak go joworingi ruwaŋe.

² Paka yiro duny woko, apaka bende gwey jo woko; paka odok leny i mac apaka jokidakana josika ruwaŋ Were.

³ To weyi joma timo gim'otire jowosangala, weyi jowoyodere ruwaŋ Were; weyi jokoki gi kisangala!

⁴ Wer ri Were, wer pak ri nyinge; yik royo ri ŋata gweco i pondeponde nyingi go obedo Rwoth, yodere ruwaŋe.

⁵ Were, ma bedo i ot pere maleŋ, kwonga nyithindho kic aka kuro mon tho.

⁶ Were miyo joma gayagaya peco ma jobed'iye; to wodho jom'otwey woko i thwolo i kisangala, to jopiem jolabedo i piny m'ojwangi.

⁷ Awi Were, munyo itelo ji perin, munyo iŋanjo i thim,

⁸ piny oyengere, to polo konjo piny koth ruwaŋ Were. Sinai okirin ruwaŋ Were, Were pa Joisiraili.

⁹ Imiyo koth madwoŋ ocwe t'idwoko alunja perin m'oyido tangatanga;

¹⁰ Mwendi perin jonwaŋo kabedo kenyo; i bero perin, Awi Were, ipidho jocandi.

¹¹ Rwoth wodho or; to mon kweth jotiŋo wac maber:

¹² “Kerin gi jolweny pajo joringo!” Mon ma jodoŋ peco jopoko gim'onyaga.

¹³ Kiri jono ma jodoŋ peco kuro rombo, onyo pama joumere gi feza gi zahabu, paka bwombi akurin ma jopilin.

¹⁴ Munyo jameni je okedho woko kerin kenyo, pe ooy kwoŋ Zalmon.

¹⁵ A got ma jameni, got ma Basan; a got ma jatunge kweth, got ma Basan!

¹⁶ Raŋo ineno gi nyeko, a got ma jatunge kweth, got ma Were ogomba bed'iye, kama Rwoth labed'iye, cil gi cil?

¹⁷ Gi cawila ma meni, ma gana apar dirio, gana gi gana, Rwoth obino wok Sinai i Kabedo Maleŋ.

¹⁸ Iyidho got mabor, itelo jom'omak i gar perin, t'ijolo mic kwoŋ ji, kiri kwoŋ ji perin ŋey Rwoth Were wonyali bedo kenyo.

¹⁹ Silwany wobedi ri Rwoth, ma tiŋo wan malo kisi ndelo; Were obedo both mawan.

²⁰ Were mawan obedo Were ma both, aka go obedo Were, Rwoth ma botho wan kwoŋ tho.

²¹ To Rwoth laŋidho wic jokwor pere, sangaria ma yer pa jono ma jomena woth i yo mareco.

²² Rwoth owaco ni, “Aladwoko jo wok Basan, aladwoko jo wok i pendi nam,

²³ ŋey winyal lwoko tiendi win i remo, ŋey lew gwokere mewin jowonyal limo adec pajo wok kwoŋ jakwor”.

²⁴ Awi Were, woth perin ma leŋo nenere gi je woth perin, Kere paran k'idonjo i Kabedo Maleŋ.

²⁵ Jower jowero ruwaŋe, jokudho gwara yucen, i dier jo nyir ma nyaka joay jogoyo sasi.

²⁶ “Pak Were i kacokirok madwoŋ! Pak win Rwoth, win nyikway Yakobo.”

²⁷ Eno Benyamin, mathin loyo joje, am'otelo, jodhum pa Yuda i kweth pajo, wot kerin pa Zebulun, jodhum pa Nafital.

²⁸ Nyuthi meni perin, Awi Were; nyuthi cwinyo perin, Awi Were, paka oyido itieko timo riwan con.

²⁹ Ro ot perin i Yerusalem kerin jotiŋo rin mic.

³⁰ Bwok Misir, ogwaŋ manitie i kede no, bwok nonin, sidwol thwondhe no ma jonigi roci pajo, cuka joje jokule piny to jomiyin feza. Kedhi jono ma jomaro lweny!

³¹ Ge ma welo wokel wok i Misir, weyi Ethopiya wokwakere yaro cinge ri Were.

³² Wer win ri Were, win kerin ma piny; wer win pak ri Rwoth,

³³ rigo ma gweco i polo, polo macon, winji win, go dhiro dwonde, dwonde manitie gi meni.

³⁴ Tuci meni pa Were, go ma meni pere ma dhum othoko Isiraili; aka meni pere nitie i pondeponde.

³⁵ Were kelo bwok i kabedo pere maleŋ, Were pa Isiraili, go miyo meni gi cwinyo ri ji pere. Pak Were!