Zabuli 66 - KITAWO MALEŊ Catholic

Wer ma pak gi foyo

¹ Pak win Rwoth gi koko ma kisangala, piny gibe;

² Wer win dwoŋ ma nyinge; miy win go pak madwoŋ.

³ Waci ri Were ni, “Nga tim perin obedo ma gir'aura! Ro meni perin madwoŋ, jokwor perin joriewere piny gi lworo ruwaŋin.

⁴ Piny gibe lamin; jowero wer ma pak rin, jopako nyingin gi wer.”

⁵ Biye aka inen gima Were otieko timo, tim pere ma gir'aura i dier ji.

⁶ Oloko ran piny m'othwo; kwarere mawan joluwo i malawa atiendi. Wafore gi go kenyo.

⁷ Go dhumo gi meni cil gi cil, go ma waŋe neno nonin je, weyi jopiem jokiri jowotiŋere malo.

⁸ Pak win Were mawan, nonin je; weyi derino ma pak mewin wowinjere;

⁹ Go otieko kuro kwo mawan, aka k'oyeyo wapodho.

¹⁰ Kole in, Awi Rwoth, itieko temo wan; Itieko temo wan paka feza m'itemo gi mac.

¹¹ Itieko ciko wan i bwo; t'ijengo bieto i dieŋey wan.

¹² Iweyo jokwor mawan jonyono wan; waluwo i mac gi pi; to kucel pama onyo itieko kelo wan i lowo malac.

¹³ Alabino i ot perin gi mic awaŋa; alamiyin gim'atieko ciko.

¹⁴ Alamiyin gima dhokan otuco to ciko munyo anitie i teko.

¹⁵ Alamiyin mic awaŋa ma nyithindhi rombo ma cwe, gi yiro ma cowirok ma rombo; alamiyo mic ma thwondhe gi diegi.

¹⁶ Wijoje ma wilworo Were, biye wiwinji, aka alawaco gima go otieko timo ran.

¹⁷ Aywak rigo, to siemere gi lewan.

¹⁸ Bedi oyido ater reco pa gimadwoŋ i cunyan, di Rwoth k'onyalo winjan.

¹⁹ To adieri Were otieko winjan; otieko winjo kwayo paran.

²⁰ Pak wobedi ri Were, rupiri go k'okwero kwayo paran, kosa k'omonan mar pere makiwire.