Zabuli 64 - KITAWO MALEŊ Catholic

Kwayo ma kikwonga

¹ Winji dwondan, Awi Were, i kigeŋisa paran; kur kwo paran i lworo m'omakan ro jokwor paran.

² Panan kwoŋ nyaliŋliŋ m'aracama tiendi pa jokidakana, kwoŋ can pa joreco.

³ Jopako lew gin paka abore, to joyiko wac mager paka aserin,

⁴ jobayo wok i kapondo kwoŋ ji ma bu reco, jobayo kwoŋ jo abwap kendo ma bu lworo.

⁵ Jonitie g'atoŋa ma timo reco; joluwo ciko bwo nyaliŋliŋ, ka joparo ni, “Ŋa manyalo neno wan?

⁶ Ŋa m'odwar tiendi banjin mawan? Watieko paro kwoŋ acama tiendi ma rieko! Kole paro g'adundo pa dhano kiniaŋere!”

⁷ To Were labayo asere pere kwoŋ jo; ilamiyo jo litho abwap.

⁸ Ro lew jo, Were lareyo woko jo; jono je ma joneni jolayengo wiy gin.

⁹ Nyaka to ji jobedo gi lworo; jolaparo kwoŋ gima Were otieko timo, to joluwo kwoŋ tim pere.

¹⁰ Weyi ji ma jotimo gim'otire jowofore i Rwoth, to jonwaŋo kapondo i go; weyi ji ma cuny gin olony jomiy go dwoŋ.