Zabuli 62 - KITAWO MALEŊ Catholic

Wer ma geno i Were kende

¹ Kole akuro Were moth wobothan; both paran wok bonge.

² Go kende a tele paran aka both paran, kapondo paran, ak'oyengere.

³ Kiri keraŋo ma wilamonjo dhano, ma yeco go, go ma kitek loyo cel m'otur piny?

⁴ Joparo nyaka rwadho go piny wok i kabedo pere madwoŋ. Josiemere i twodo, jomiyo silwany gi dhok gin, to jolamere i cuny jo.

⁵ Kole Were kende ama cunyan kuro nyaliŋliŋ, kole geno paran wok bonge.

⁶ Go kende a tele paran aka both paran, kapondo paran, ak'oyengere.

⁷ Both gi dwoŋ paran cungo kwoŋ Were; tele paran matek, i Were a kapondo paran.

⁸ Geni Were hongo je, ji paran, oy adundo perin ruwaŋe, Were obedo k'apondo mawan.

⁹ Ji jocale luya ma ywe; jomadongo gi jomathindho je jongoye kony. Kethi jo i rapim, jok'oyway kilo; josew loyo luya ma ywe.

¹⁰ Ikir'ikethi geno iy'akaka, ikir'ikethi geno m'ongoye i kwo; ka ŋaŋo omedere, ikir'ikethi cunyin kwoŋe.

¹¹ Maloyo dicel atieko winjo Were waco ni, meni obedo apere,

¹² aka ni mar makiwire obedo apa Rwoth. In won gipi, Awi Rwoth, imiyo dhano kemba cungo kwoŋ tim pere.