Zabuli 59 - KITAWO MALEŊ Catholic

Kwayo ri siem

¹ Gonyan i cingi jokwor paran, Awi Were paran; kwonga an kwoŋ jono ma jomonjan!

² Gonyan kwoŋ jono ma jotimo reco, aka ibothan kwoŋ jonek no!

³ Kole neni, jokuro nekan, jogwayo jocokere kwoŋan, ki kwoŋbedo ni atimo reco kosa komo paran m'atieko timo,

⁴ kosa ni atimo banja ma jokwakere i kabedo pajo. Ay, biye konyan, aka inen!

⁵ In Rwoth pa lwak jolweny, ibedo Were pa Isiraili. Cew t'imiyo nonin je gir'acula; ikir'iwey kad'acel kwoŋ jobanirok ma jotimo can marac.

⁶ Kisi othieno jodwoko, joŋur paka gwokere, ka jowotho i tindi madwoŋ.

⁷ Winji yet g'atise pajo. Lew jo cal abore i dhok jo, kucel joparo ni ongoye ŋata winjo jo.

⁸ To inyero jo, Awi Rwoth, iŋalo nonin je ma jokuya Were.

⁹ Ibedo meni paran, alapakin; kole in, Awi Were, ibedo kapondo paran.

¹⁰ Were paran, laromo kodan i mar pere makiwire, Were paran lamiyan anen kikengila pa jokwor paran.

¹¹ Ikir'ineki jo, Awi Were, kosa ji paran wiy jo nyalo wil; kedhi jo woko gi meni perin aka ikengila jo, Awi Rwoth, kwot mawan!

¹² Ro reco ma dhok jo, wac ma dhok jo, weyi jowomoki i delok pajo. Ro lamirok gi twodo ma joluwo,

¹³ reyi jo i keme perin, reyi jo kicutho. Nyaka ji jowoŋey ni Were dhumo Isiraili, i kisi thenge ma piny.

¹⁴ Kisi othieno jokwor paran jodwoko, joŋur pa gwokere, ka jowotho i tindi madwoŋ.

¹⁵ Jolera ri cemo, jogwe ka jok'oyeŋ.

¹⁶ To alawero ro meni perin, kisi odikin alawero malo ri mar perin makiwire. Kole iŋat'ibedo kapondo paran, gi ka ŋwec paran i hongo ma kidamba paran.

¹⁷ Ibedo meni paran, alawero pak rin, kole in, Awi Were, iŋat'ibedo kapondo paran, Were ma nyuthan mar makiwire.