Zabuli 58 - KITAWO MALEŊ Catholic

Kwayo ri Were womiy jokidakana gir'acula

¹ Adieri win rwodhe, wiyere i gim'otire? Withumo banja ri ji gi tiro?

² Be, iy'adundin mewin wiparo kwoŋ reco ma winyalo timo, to witimo tim mar'akaka i piny.

³ Jokidakana jomienere gi iy megi jo, jotimo gi komo wok i nywolirok, joluwo twodo.

⁴ Jonitie gi kwir ma cal apa thwol, paka malasaŋ ma culo ithe,

⁵ ma kinyal winjo dwondi ji ma jotega jo, kosa wer pa ŋata timo gidhier.

⁶ Awi Were, tur lak jo i dhok jo, tur woko lak simbwore no mathindho thindho, Awi Were!

⁷ Weyi jowoleny paka pi ma mol; paka lum, weyi wonyon jo to joner.

⁸ Weyi jowocal gi othiololo maleny i ode; weyi jowobedi pa nyathi m'onywol m'otho ma kinen waŋceŋ.

⁹ Mafodi jokuya, i ŋolo jo pa doy; i keme pere, Were lakudho jo woko kafodi jokwo.

¹⁰ Joma timo gim'otire jolakisangala ka joneno imiyo joreco gir'acula; jolalwoko tiendi jo i remo pa jokidakana.

¹¹ Ji jolawaco ni, “Adieri nitie kemba pa joma timo gim'otire; adieri nitie Were ma thumo banja ri piny”.