Zabuli 54 - KITAWO MALEŊ Catholic

Kwayo ri kony kwoŋ jokwor

¹ Bothan, Awi Were, gi nyingin, gonyan gi meni perin!

² Winji kwayo paran, Awi Were; ciki ithin iwinji wac ma wok i dhokan.

³ Cwo ma jocay joay monjan, cwo mager jorango kwo paran, cwo ma jokidew kwoŋ Were.

⁴ Neni, Were obedo jakony paran. Rwoth ama gwoko kwo paran.

⁵ Go lamiyo jo gir'acula gi raco pajo wegi, Go lareyo woko jo kwoŋbedo go timo adieri.

⁶ Abino miyin cowirok gi kisangala, Awi Rwoth. Abino foyo nyingin, Awi Rwoth, kwoŋbedo obedo gimaber.

⁷ Kole ibothan kwoŋ teko je, aka waŋan otieko neno kikengila pa jokwor paran.