Zabuli 52 - KITAWO MALEŊ Catholic

Lew jo ma twodo

¹ Raŋo inor, a jal ma jameni, ri raco perin? Adieri pa Were bedo cil gi cil.

² Itimo can ma kisika joman; lewin cal kamweso mabith. Tic perin twodo.

³ Imaro raco loyo bero, twodo loyo luwo adieri.

⁴ Imaro ramo cuny ji, in jatwodo!

⁵ To Were lakisika in kicutho, go lagwarin to yecin wok i wema perin, go lafudhin wok i piny pa ji makwo.

⁶ Joma jotimo gim'otire jolaneno, to lworo mako jo, aka jolanyerin, ka jowaco ni,

⁷ “Neni jal m'okwero Were bedo kapondo pere, to geno ŋaŋo pere madwoŋ, opondo i lim pere!”

⁸ To acalo yath oliv, madongo i Ot pa Were, ageno mar pere makiwire cil gi cil.

⁹ Abino foyin noknok, ro gim'itieko timo; alapako nyingin kwoŋbedo ber, ruwaŋ ji perin.