Zabuli 5 - KITAWO MALEŊ Catholic

Kwayo ma kikwonga

¹ Awi Rwoth, ciki ithin ri gim'awaco, aka winji uci paran.

² Winji derino ma ywak paran, kere paran, aka Were paran, kole akwayin won.

³ Awi Rwoth, iwinjo dwondan odikin, ka ceŋ wok amiyo mic paran ma kwayo, t'akurin idwokan.

⁴ Kole ibedo Were ma kisangala gi kidakana, ikiyey raco ruwaŋin.

⁵ Jonoro jokinyal cungo ruwaŋin, idaki joreco je.

⁶ Ireyo woko jotwodo je, aka idaki jonek gi jomisegey.

⁷ To kwoŋbedo mar perin makiwire, aladonjo i ot perin, abino lamin i Ot perin maleŋ t'abwonere rin gi lworo.

⁸ Rwoth, telan, i tiro perin kwoŋbedo athothi gi jokwor. Yaw ran yo perin ŋey anyal luwo.

⁹ Kole lew jokwor paran opoŋ twodo, joparo reyo ji iy'adundo pajo, jopelo ji gi wac pajo, m'opoŋ'iye misegey ma tho.

¹⁰ Thum rijo banja aka imiy jo gir'acula, Awi Were weyi wegi joworere gi can pajo ma nek. Riemi woko jo ruwaŋin kwoŋbedo jotimo reco kweth, aka jogwenyere kwoŋin.

¹¹ To weyi ji ma jopondo i in jowofore weyi jowower ri kisangala. Kwonga jono ma jomarin, kwoŋbedo i in jonitie gi kisangala mar'adieri.

¹² Kole imiyo joma timo gim'otire silwany, Awi Rwoth ikwonga jo gi mari perin paka gi kwot.