Zabuli 49 - KITAWO MALEŊ Catholic

Sikoyiko ma kwo

¹ Winji gime, kisi nyatoro! Ciki ithi win, nonin kisi kamoro,

² madongo gi mathindho je, jocandi gi joŋaŋo kanyacel!

³ Dhokan laluwo rieko; paro ma cunyan labedo niaŋ.

⁴ Alaciko ithan ri ageca, alatito sikoiyiko me k'atuko tongol paran.

⁵ Raŋo abedi malwor i hongo ma teko, ka jokwor paran jothokan,

⁶ ji ma jogeno lim pajo, aka jonor gi ŋaŋo pajo madit.

⁷ Adieri ongoye ŋata nyalo nyewo kwo pere, kosa culo Were welo ma kwo pere.

⁸ Kole welo ma kwo pere dwoŋ swa, aka ongoye gima romo culo,

⁹ ŋey go wokwo cil gi cil, aka wokiri wotho.

¹⁰ Ey, go laneno ni kiri ji mariek bende jotho, jomamiŋ gi joniaŋ manok je jotho, aka joweyo lim pajo ri joman.

¹¹ Kaliel pajo bedo pecin pajo cil gi cil, kabedo pajo i luse je, makada nende oyido jonitie gi lowo pajo wegi.

¹² Dwoŋ pa nyatoro kibothi go tho, go fodi latho paka ogwaŋe.

¹³ Me gike pa ji ma wegi jogenere, gike pa ji ma joyeŋ gi lim pajo.

¹⁴ Jolarere paka rombo, Tho labedo jakwath pajo. Ji ma jotimo gim'otire jobino loyo jo, ka delkwoŋ gin top piyo, piny pa jom'otho labedo pecin pajo.

¹⁵ To Were labotho adundo paran kwoŋ meni pa tho, kole go lajolan.

¹⁶ Ikir'ibwoki ka nyatoro oŋaŋ, ka lim pere olokere madwoŋ;

¹⁷ kole ka go otho, ongoye gima go latiŋo, kilakadho gi lim pere.

¹⁸ Makada nende, munyo go kwo, okwanere gi kisangala, aka makada nende dhano limo pak ro lim pere,

¹⁹ go lakadho i luse pa kwarere pere ma jok'oneni lero kendo.

²⁰ Dwoŋ pa nyatoro kibothi go tho go fodi latho paka ogwaŋe.