Zabuli 47 - KITAWO MALEŊ Catholic

Jadhum madwoŋ loyo

¹ Goy win adhoŋ, nonin je, Pak win Were gi wer ma winjere malo.

² Kole Rwoth, Were madwoŋ loyo iripo lworo; kere madwoŋ kwoŋ piny gibe.

³ Go oketho ji i tiendi wan, to miyo wan dhumo nonin.

⁴ Go oyero riwan lowo ma wabed'iye, noro pa Yakobo ma go omaro.

⁵ Were otieko kadho malo i kom pere ma dhum. Nitie koko ma siem gi dwondi gwara, kareno Rwoth kadho malo.

⁶ Wer pak ri Were, wer pak! Wer pak ri kere mawan, wer pak!

⁷ Kole Were obedo kere ma piny gibe, pak go gi wer.

⁸ Were dhumo nonin; Were bedo i kom pere ma dhum maleŋ.

⁹ Jodhum ma nonin jocokere paka ji pa Were pa Abraham. Kole kwote ma piny obedo apa Were; go obedo jadhum madwoŋ loyo.