Zabuli 39 - KITAWO MALEŊ Catholic

Kwo cek

¹ Awaco ni, “Abino gwokere i gim'atimo, ŋey akir'atim reco gi lewan. Abino mwono dhokan, ka jokidakana jonitie bongan.

² Oyido acale obadha, aka akiluwo wac, kada ma mako kwoŋ gimaber! To candirok paran omedere loyo,

³ aka cunyan owaŋan. Paka aparo, apaka amedere bedo i teko, kenyo akinyalo weyo m'akikwayo ni,

⁴ Rwoth, weyi aŋey gike ma kwo paran. Alatho keraŋo? Waci ran ceko ma kwo paran.”

⁵ Neni, imiyo ndelo paran bedo manok, kwo paran ongoye cwe ruwaŋin. Adieri kisi dhano cal koyo,

⁶ adieri dhano cal tipo. Gima jotimo je ongoye, jocoko lim, to jokiŋey ŋata bino doŋ gine.

⁷ Aka onyo, aŋo m'anogen Awi Rwoth? Geno paran nitie i in Rwoth.

⁸ Bothan kwoŋ reco paran je, aka ikir'iwey jomamiŋ jowonyeran.

⁹ Abino cal obadha, akibino luwo wac, kole iŋat'imiyan candirok ama.

¹⁰ Ikir'imedi miyan gir'acula, acegin tho gi goco ma wok i cingin.

¹¹ Imiyo wan gir'acula gi bwoko wan, aka inyeko gima wamaro paka thuth. Adieri kisi dhano cal koyo!

¹² Winji kwayo paran, Awi Rwoth, aka ciki ithin ri ywak paran; biye konyan k'auja. Kole abedo wendo manitie i woth, jawoth, paka kwarere paran.

¹³ Weyere kodan ŋey anyal bedo gi kisangala moro, mafodi akikadho t'arwenyo ma kinen kendo.