Zabuli 37 - KITAWO MALEŊ Catholic

Gike pa jokidakana gi jomaber

¹ Ikir'irembi ro jokidakana, ikir'imaki nyeko gi joma timo raco.

² Kole jocegin rwenyo paka lum ma thwo woko, jobino thwo paka yen ma ner.

³ Kethi geno i Were, aka tim bero, ŋey ikwo i piny m'ongoye teko.

⁴ Dwar kisangala perin wok bongi Rwoth, aka go bino miyin gima cunyin yenyo.

⁵ Miy Rwoth yo perin, kethi geno perin i go, aka go bino konyin,

⁶ go bino miyo timo gim'otire perin liel paka ceŋ m'odikin.

⁷ Bedi liŋ ruwaŋ Rwoth, aka ikuri go moth, ikir'irembi kwoŋ jono ma joyindira kosa jono ma jobedo gi loyo i can pajo marac.

⁸ Ikir'irembi, kosa imaki nge, gino kelo teko ayin.

⁹ Jono ma joketho geno i Rwoth jobino lunjo lowo ma Rwoth ociko, t'ibino riemo jokidakana woko.

¹⁰ Jokidakana jocegin rwenyo, inyalo rango jo, t'ikibino nwaŋo jo.

¹¹ To ji mamwol jobino lunjo lowo, jolawinjo cwe mere gi siem.

¹² Jokidakana jotimo can ri jomaber, aka joneno jo gi dakirok.

¹³ To Rwoth nyero jokidakana, kole go oŋeyo ni jobino rwenyo piyo.

¹⁴ Jokidakana jocelo abor pajo aka jokomo woko aserin pajo, neko woko jocandi ji ma bu gimoro, thumo jono ma jotimo gim'otire.

¹⁵ To abor pajo bino donjo i cuny jo wegi, aka ibino turo woko aserin pajo.

¹⁶ Gima nok ma ŋataber nitie gine, dikony loyo madit ma jakidakana nitie gine,

¹⁷ kwoŋbedo Rwoth bino turo cingi jokidakana, to kwonga jomaber.

¹⁸ Rwoth oŋeyo ndelo pa jono ma jongoye g'apuse, aka gir'alunja pajo bedo cil gi cil.

¹⁹ Jokibino bedo giwickwot i hongo marac, jobino bedo gi ma romo i ndir ma kec.

²⁰ To jokidakana jolarere, jokwor pa Rwoth jobino rwenyo paka mawuwa madudi, jobino rwenyo paka yiro.

²¹ Jokidakana jokwayo gigipiny, aka jokinyal culo, to jomaber jomiyo m'ongoye olo.

²² Kole jono ma Rwoth omiyo jo silwany jobino limo lowo, aka jono ma go okwoŋo ibino riemo woko.

²³ Rwoth nyutho ji yo ma jowoluwi, aka kwonga jono ma josangala go,

²⁴ makada nende jopodhi, jokibino doŋ piny, kwoŋbedo Rwoth konyo jo ay malo.

²⁵ Wok i soye paran, tundo gunyo ni ee ati, fodi akineno ka Rwoth ojwango jomaber, kosa ka nyithindho pajo jokwayo mugat.

²⁶ Jopoko ma nono noknok, aka jokopa ji, aka nyithindho pajo jobedo silwany.

²⁷ Weyi raco, aka tim bero, ŋey ikwo cil gi ci.,

²⁸ Kole Rwoth omaro tiro, aka go kilajwango ji pere ma jotimo adieri, go kwonga joma timo gim'otire, t'ilareyo woko nyikway jokidakana.

²⁹ Ji ma jotimo gim'otire jobino limo lowo to jokwo i iye cil gi cil.

³⁰ Dhok jomaber luwo rieko, aka lew gin luwo tiro.

³¹ Jokuro cik pa Were pajo i cuny jo, aka jokiwey.

³² Jokidakana joŋiyo jomaber, aka jotemo neko jo.

³³ To Rwoth kilajwango jomaber i cingi jokwor pajo, kosa weyo wothum rijo banja ka itemo jo.

³⁴ Kethi geno perin bongi Rwoth aka luw Or pere, go bino miyin dwoŋ to miyin lowo, aka ibino neno k'iriemo jokidakana.

³⁵ Atieko neno jakidakana mager, diyo ji aka ay malo paka yath sida ma Lebanon,

³⁶ to rumacen aluwo, aka go oyido ongoye kendo, arango go, t'akinyalo nwaŋo go.

³⁷ Kaŋasa ji ma jongoye g'apuse, aka neni ji ma jotimo gim'otire, kole ji ma jomaro siem jonitie gi nyikway gin,

³⁸ to joreco jorere kicutho, ilaneko woko nyikway jokidakana.

³⁹ Rwoth botho ji ma jotimo gim'otire, go obedo kapondo pajo i hongo ma teko.

⁴⁰ Rwoth konyo jo aka botho jo, go botho jo kwoŋ jokidakana, kwoŋbedo jopondo i go.