Zabuli 28 - KITAWO MALEŊ Catholic

Kwayo ma kony

¹ Awi Rwoth, alwoŋin, tele paran ikir'icul ithin ran, k'inoliŋan, abino cal jono ma jokadho i piny pa jom'otho.

² Winji ywak paran ri kony, k'atiŋo cingan malo i ot perin maleŋ.

³ Ikir'ithum ran banja kanyacel gi jokidakana, gi jono ma jotimo reco, gi jono ma joluwo gi siem gi joger pajo, kucel jokano ŋonge i cuny jo.

⁴ Miy jo gir'acula ro gima jotimo, ro reco ma jotimo. Miy jo gir'acula ro tim pajo je, miy jo gima ripo gi jo.

⁵ Jokidew kwoŋ gima Rwoth otieko timo, kosa gima Rwoth ocweyo, ameno go bino miyo jo gir'acula to reyo jo kicutho.

⁶ Pak win Rwoth! Kole Rwoth otieko winjo ywak paran ri kony.

⁷ Rwoth obedo meni paran aka kwot paran, aketho geno paran i go. Rwoth miyan kony aka sieman, apako go gi wer ma kisangala.

⁸ Rwoth obedo meni pa ji pere, go botho aka kwonga kere pere m'oyero.

⁹ Bothi ji perin Rwoth, aka miy jono ma jobedo aperin silwany. Bedi jakwath pajo, aka ikuri jo cil gi cil.