Zabuli 144 - KITAWO MALEŊ Catholic

Kere foyo Were ro turo lweny

¹ Rwoth wopak, tele paran, ma fonjo cingan ri lweny, gi lwet cingan lwenyo.

² Go obedo tele paran gi kapondo paran, kapondo paran gi jaboth paran, kwot paran, m'apondo bonge, go ketho nonin i dhum pere.

³ Awi Rwoth, dhano obedo aŋo m'idewo kwoŋe, kosa wod dhano m'iparo kwoŋe?

⁴ Dhano cal luya, ndelo pere rere paka tipo.

⁵ Bar pondeponde perin, Awi Rwoth, ilor piny! Gey gote jowonyal wodho yiro!

⁶ Dhiri pilin pa lithkoth t'ikedho jokwor perin, dhiri aserin perin t'imiyo jo ŋwec!

⁷ Riey cingin wok i ŋawirok, bothan, iwodhan wok i pi maluth, bothan wok i cingi jopath.

⁸ Ji ma dhok gin luwo twodo, ji ma jotiŋo malo cingi gin maracuc twodo.

⁹ Alawero wer manyen rin, Awi Were; alatuko rin tongol ma thondhe apar.

¹⁰ Iŋat'imiyo loyo ri kerin, iŋat'ibotho Daudi ŋeca perin.

¹¹ Bothan kwoŋ abor mager, bothan wok i cingi jopath, ji ma dhok gin luwo twodo, ji ma jotiŋo cingi gin maracuc twodo.

¹² Weyi wot wan i soye pajo jowobedi paka cemo m'otieko dongo, nyithindho mawan manyir jowobedi paka sirin ma sonda, m'oranda ma geto peco pa kere.

¹³ Weyi dere mawan wopoŋ gi cemo nger gi nger; weyi rombo mawan jowonywol gana gi gana, jowonywol digana apar i ndelin mawan.

¹⁴ Weyi dhok mawan jowonywol nyithindhi jo kweth, m'ongoye ma iye wopodho woko kosa ma k'onyalo colo nyathi; weyi ywak ma kidamba wongoye i royin mawan!

¹⁵ Jokisangala a jono ma nger silwany no podho kwoŋ jo! Jokisangala a jono ma Were pajo obedo Rwoth!