Zabuli 141 - KITAWO MALEŊ Catholic

Kwayo m'othieno

¹ Alwoŋin, Awi Rwoth, redi bongan, winjan, k'alwoŋin.

² Weyi kwayo paran wotundi bongin paka buban, gi tiŋo cingan malo paka cowirok m'othieno.

³ Gwok dhokan, Awi Rwoth, mwon dhokan wokiri woyawere.

⁴ Ikir'iwir cunyan timo reco moro je, gi oro kwo paran timo gikidakana, i kitipa pa ji ma jotimo reco, aka ikir'iyey acem i kalima pajo.

⁵ Weyi ŋataber wocwadan kosa woyetan i wor, to ikir'iyey mo pa jakidakana wowir i wiyan; kole kwayo paran noknok mako kwoŋ tim ma kidakana pajo.

⁶ K'okethi jo i cingi jono ma jobino thumo ri ji banja, nyaka jolaŋeyo ni wac pa Rwoth obedo adieri.

⁷ Paka tele ma dhano tiŋo to baro piny, apaka cokin pajo ilabaro i dhok piny pa jom'otho.

⁸ To waŋan ŋiyin, Awi Rwoth Were, arango kapondo bongin, ikir'iwey atho!

⁹ Bothan kwoŋ mitego ma jociko ran, gi bwo pa joreco!

¹⁰ Weyi jokidakana jowopodhi kanyacel i bwo pajo wegi, kareno akwale m'ongoye litho.