Zabuli 135 - KITAWO MALEŊ Catholic

Wer ma pak

¹ Pak win Rwoth! Pak win nyingi Rwoth, win ŋecin pa Rwoth pak win go.

² Win ma wicungo i Ot pa Rwoth, i diedipo ma Ot pa Were mawan.

³ Pak win Rwoth, kwoŋbedo Rwoth ber, wer win ri nyinge, kwoŋbedo go jakisa.

⁴ Kole Rwoth otieko yero Yakobo rigo won, Isiraili paka lim pere won.

⁵ Kole aŋeyo ni Rwoth dwoŋ, Rwoth mawan dwoŋ loyo werin je.

⁶ Go timo gimoro je m'amito, i polo gi piny, i name gi pendi piny.

⁷ Go ama miyo pondeponde gulo i witum ma piny, go timo lithkoth ri koth, to wodho koyo wok i udi pere ma kan.

⁸ Go am'oneko okayin i Misir, ji g'ogwaŋe parom.

⁹ Go odhiro ranyuth gi gir'aura i dier win, awi Misir, kwoŋ Farawo gi ŋecin pere je.

¹⁰ Go oreyo woko nonin kweth, to neko kerin ma jomeni,

¹¹ Sihon kere pa Joamor, Og kere ma Basan, gi kerin man ma Kanan,

¹² to miyo lowo pajo paka gir'alunja, gir'alunja ri ji pere Isiraili.

¹³ Nyingin, Awi Rwoth, yindira cil gi cil, luse je lapoyin.

¹⁴ Kole Rwoth lathielo ji pere, to bedo gi mar kwoŋ ŋecin pere.

¹⁵ Cal pa nonin obedo feza gi zahabu, tic ma cingi dhano.

¹⁶ Jonitie gi dhok gin, to jokiluwi, jonitie gi waŋ gin, to jokinen,

¹⁷ jonitie gi ithi gin, to jokiwinji, luya ongoye i dhok gin.

¹⁸ Joma timo jo, gi joma geno i jo, jolacale gi jo.

¹⁹ Awi ot pa Isiraili pak Rwoth, Awi ot pa Aron pak Rwoth.

²⁰ Awi ot pa Levi, pak Rwoth; win ma wilworo Rwoth pak win go!

²¹ Rwoth wopak i Zayon, go ma bedo i Yerusalem! Rwoth wopak!