Zabuli 132 - KITAWO MALEŊ Catholic

Pako Ot pa Were

¹ Awi Rwoth, poyi Daudi, gi teko je m'ociro.

² Poyi cikirok ma go otimo, kwoŋirok m'otimo rin, Were Majameni pa Yakobo ni,

³ “Akibino donjo i ot paran, kosa i kanindo paran,

⁴ akibino ywomirok kosa nindo,

⁵ cuka ageto ot ri Rwoth, Were Majameni pa Yakobo.”

⁶ Wawinjo kwoŋ Kakan ma Cikirok i Efratha, aka wanwaŋo i sa ma Yar.

⁷ Wawaco ni, “Weyi wakadhi i Ot pa Rwoth; weyi walam ruwaŋ kom pere ma dhum.”

⁸ Ay, Rwoth, aka ikidhi i ot perin gi Kakan ma Cikirok, ranyuth ma meni perin, aka ibedi ka cil gi cil.

⁹ Weyi jocway ri Were i wi migam perin jowotimi gim'otire; weyi ji perin jowokoki ri kisangala!

¹⁰ Itimo cikirok ri ŋeca perin Daudi; ikir'ikwer kere perin m'iyero, Awi Rwoth.

¹¹ Imiyo Daudi cikirok mar'adieri, cikirok m'ikibino wiro ni; “Abino ketho acel kwoŋ wotin kere, aka ladhumo yuŋeyin.

¹² Ka wotin jokur cikirok paran, gi cik m'amiyo jo, wot jo bende jolalunjin paka kere i hongo je.”

¹³ Kole Rwoth otieko yero Zayon, mito loko kabedo pere.

¹⁴ Me kaywomirok paran ma cil gi cil, me kama alabed'iye paka amito.

¹⁵ Alamiyo Zayon ŋaŋo kweth gi gima go mito je; alamiyo jocandi pere jowoyeŋ gi cemo.

¹⁶ Alamiyo jocway ri Were i wi migam pere silwany i gima jotimo je, aka ji pere jolawero to jokoko ri kisangala.

¹⁷ K'anokethi acel kwoŋ nyikway Daudi bedo kere madwoŋ; alakuro dhum pa kere paran m'ayero.

¹⁸ Alaruko jokwor pere gi wickwot, to go labedo kere m'opoŋ gi dwoŋ.