Zabuli 116 - KITAWO MALEŊ Catholic

Pak pa ŋat'obothi tho

¹ Amaro Rwoth kwoŋbedo, owinjo dwondan gi kwayo paran.

² Kwoŋbedo go ciko ithe ran, kisi hongo k'alwoŋo go.

³ Bwo ma tho oyido othokan, lworo ma tho oyido ouman; oyido apoŋ gi lworo gi bwok.

⁴ Kenyo alwoŋo nyingi Rwoth ni, “Awi Rwoth, akwayin, both kwo paran!”

⁵ Rwoth jawor, aka timo gim'otire; Were mawan jakisa.

⁶ Rwoth kwonga joma sisiri, munyo oyido anitie i teko, go obothan.

⁷ Bedi m'icwiny, cunyan, kwoŋbedo Rwoth onyuthin bero.

⁸ Kole obotho cunyan kwoŋ tho, waŋan kwoŋ ywak, gi tiendan kwoŋ cer.

⁹ Awotho ruwaŋ Rwoth, i piny pa ji makwo.

¹⁰ Akuro yeyo paran, kiri munyo awaco ni, “Aloc kicutho.”

¹¹ Kiri munyo abwok t'awaco ni, “Ongoye ŋata genere.”

¹² Aŋo m'anomiy Rwoth, ro bero pere je ran?

¹³ Alatiŋo malo kikopo ma foyo, t'alwoŋo nyingi Rwoth.

¹⁴ Abino culo cikirok paran ri Rwoth i cokirok pa ji pere je.

¹⁵ Rwoth winjo litho, k'acel kwoŋ ji pere otho!

¹⁶ Awi Rwoth, abedo ŋeca perin, atiyo rin paka mama otimo. Itieko bothan kwoŋ tho.

¹⁷ Abino miyin cowirok ma foyin t'alwoŋo nyingi Rwoth.

¹⁸ Abino culo cikirok paran ri Rwoth ruwaŋ ji pere je,

¹⁹ i diedipo ma Ot pa Rwoth, i dier in, Awi Yerusalem. Rwoth wopak!