Zabuli 107 - KITAWO MALEŊ Catholic

Kitawo mar'abic Zab 107—150 Pako bero pa Were

¹ Foy Rwoth, kole go ber, mar pere kiwire cil gi cil.

² Weyi jom'oyeyo i Rwoth jowowaci ameno, jono ma go obotho wok i teko,

³ aka ocoko wok i piny pa jopath, wok yuwok ceŋ gi yupodho ceŋ, wok yumalo gi yupiny.

⁴ Jomegi jolera i thim, jok'onwaŋo royo ma kadho i tindi madwoŋ ma jobed'iye.

⁵ Kec gi riyo pi oneko jo, aka jolacere.

⁶ Kenyo joywak ri Rwoth i teko pajo, aka ogonyo jo kwoŋ kidamba pajo;

⁷ otelo jo i royo m'otire, cuka jotundo i tindi madwoŋ ma jonyalo bed'iye.

⁸ Weyi jowofoy Rwoth ro mar pere makiwire, ro tim pere ma gir'aura rijo.

⁹ Kole go yeŋo ji ma riyo neko jo, aka miyo joma kec neko gigipiny maber.

¹⁰ Jomegi jobedo i mudho gi i twec, jotwec ma jocandere i lijegere,

¹¹ kole oyido jogwenyere kwoŋ wac pa Rwoth ma jameni je, to jokwero fonji pere.

¹² Jool gi tic matek, jopodho piny to ngoye ŋat'okony jo.

¹³ Kenyo joywak ri Rwoth i teko pajo, aka obotho jo wok i kidamba pajo,

¹⁴ owodho jo wok i mudho gi twec, to turo lijegere pajo mathindho.

¹⁵ Weyi jowofoy Rwoth ro mar pere makiwire, ro tim pere ma gir'aura rijo.

¹⁶ Kole go turo piny thigin ma ywel, aka ŋinyo cumin ma nyweny.

¹⁷ Jomegi jotwo ro reco pajo, aka jociro litho ro raco pajo,

¹⁸ waŋ gin oyido kinen cemo aka jobedo cegin gi tho.

¹⁹ Kenyo joywak ri Rwoth i teko pajo, aka obotho jo wok i kidamba pajo,

²⁰ odhiro wac pere to botho two pajo, aka ogonyo jo kwoŋ rerok.

²¹ Weyi jowofoy Rwoth ro mar pere makiwire, ro tim pere ma gir'aura rijo.

²² Joripo foyo go gi cowirok to jotuco tim pere gi wer ma kisangala.

²³ Jomegi jocewere i Nam i mel, rango nger ma kwo i nam.

²⁴ Joneno tim pa Rwoth, tic pere ma gir'aura i nam.

²⁵ Kole owodho or to koyo ma dimeni cako kudho, aka otiŋo asur i nam.

²⁶ Mel otiŋere malo i koyo, to munyere i lutho. I teko nger no jocewirok meni oloyo jo;

²⁷ jocer to jotangatanga pa jomero, aka rieko pajo ongoye kony.

²⁸ Kenyo joywak ri Rwoth i teko pajo aka obotho jo wok i kidamba pajo;

²⁹ omiyo asur kwe, aka derino pi okwe.

³⁰ Josangala kwoŋbedo nam okwe, aka Rwoth okelo jo maber kiri kam'oyido jomito.

³¹ Weyi jowofoy Rwoth ro mar pere makiwire, ro tim pere ma gir'aura rijo.

³² Joripo waco dwoŋ pere i cokirok pa ji, to jopako go i cokirok pa jotel.

³³ Rwoth omiyo malawa thwo kicutho, aka ojuko waŋ pi mol.

³⁴ Omiyo lowo maber olokere thim ma cumbi, ro kidakana pa ji m'oyido jobedo kenyo.

³⁵ Rwoth loko opalipat kidiwin ma pi, aka loko lowo m'othwo waŋ pi ma mol.

³⁶ Go miyo joma kec neko bedo kenyo, aka joget'iye tindi ma bed'iye.

³⁷ Jocwoyo ndelin aka jopidho yen vini to jonwaŋo cemo kweth.

³⁸ Omiyo jo silwany aka jonywolo nyithindho kweth; aka kiwey dhok pajo womojere.

³⁹ Ka okengila ji pa Were aka oloy jo cungo kwoŋ adica, teko, gi rembo,

⁴⁰ tero ji ma jodiyo jo gi cay, aka miyo jo kilera i kwoyo ma thim.

⁴¹ To go botho ŋata bu gimoro wok i kidamba, to miyo pecin pajo nyay paka mwendi.

⁴² Joma timo gim'otire joneno to josangala, to jokidakana je imiyo jo liŋ.

⁴³ Ŋatariek je wopar kwoŋ gigipiny me; aka wodew kwoŋ mar pa Rwoth makiwire.