Zabuli 105 - KITAWO MALEŊ Catholic

Were gi ji pere

¹ Foy Rwoth, tuci dwoŋ pere, wac ri nonin gima go otieko otimo.

² Wer rigo wer ma pak, wac gir'aura ma go otieko timo.

³ Sangala win ni wabedo ji pere, weyi jono ma jolamo go jowofore.

⁴ Rangi Rwoth gi meni pere, aka lam go noknok.

⁵ Poyi tim ma gir'aura ma go otieko timo, tim pere madongo, gi thumo banja ma go omiyo,

⁶ win nyikway Abraham ŋeca pere, wot Yakobo, ma go oyero!

⁷ Go obedo Rwoth, Were mawan; go thumo banja ri piny gibe.

⁸ Go poyo cikirok pere cil gi cil, cikirok pere ri luse gana,

⁹ cikirok m'otimo gi Abraham, gi cikirok pere ri Isaka,

¹⁰ m'oridho ri Yakobo paka cik, ri Isiraili paka cikirok ma cil gi cil,

¹¹ ka waco ama: “Alamiyin lowo ma Kanan paka adec perin alunja.”

¹² Munyo oyido jonok i welo, oyido josisiri, aka jowiloka i lowo ma Kanan,

¹³ jolweda wok i piny kadho i piny, wok i ker acel kadho i ker man,

¹⁴ to k'oyeyo moro diyo jo, ogwoko jo, aka obwoko kerin ro jo,

¹⁵ ka waco ama: “Wikiri wigeyi ji paran m'awiro gi mo, jotuci wac Were paran, wikiri witim rijo raco!”

¹⁶ Rwoth okelo kec i lowo pajo, to kwanyo woko cemo pajo je.

¹⁷ To ooro jacwo yuwiy jo, Yozefu m'oyido jotana paka ŋeca.

¹⁸ Otwey tiende gi lijegere, aka ŋute otwey gi majogi ma nyweny,

¹⁹ cuka gima go owaco otundo i kare. Wac pa Were onyutho ni go otire.

²⁰ Kenyo kere ma Misir omiyo ogony go, jadhum pa nonin ogonyo go,

²¹ omiyo go bedo rwoth ma ot pere, aka jadhum ma lim pere je,

²² gi dwoŋ kwoŋ jodhum pere, kodi fonjo jomic rieko pere.

²³ Kenyo Isiraili obino i Misir, Yakobo obedo i lowo ma Ham.

²⁴ Rwoth omiyo ji pere nyithindho kweth, aka omiyo jo bedo matek loyo jokwor pajo.

²⁵ Omiyo Jomisir dak ji pere, kodi tiyo gi jo gi gwayo.

²⁶ Rwoth ooro Musa ŋeca pere, gi Aron m'oyero.

²⁷ Jotimo tim pa Were ma meni gi gir'aura i Misir.

²⁸ Were odhiro mudho, aka oloko lowo macol; to Jomisir jogwenyere kwoŋ wac pere.

²⁹ Oloko pi pajo remo, to miyo rec pajo tho.

³⁰ Lowo pajo opoŋ ogwale, kiri i cel pa kere.

³¹ Were owodho or aka lwaŋin gi kikun, jowura i piny pajo.

³² Omiyo jo pe i kabedo pa koth, gi lithkoth m'opilin i lowo pajo je.

³³ Onyeko yen vini pajo gi yath ma nyak nyandere, to turo piny yen je.

³⁴ Owodho or, aka bonyo obino, bonyo mathindho ma kikwanere,

³⁵ jocamo dudi je ma lowo, to jocamo cemo je ma lowo pa pajo.

³⁶ Oneko okayo je, ma pecin ma Misir.

³⁷ Kenyo owodho Isiraili gi feza gi zahabu, aka joje oyido jonitie gi kwo maber aka oyido jotek.

³⁸ Jomisir oyido jolworo jo, aka josangala munyo jokadho.

³⁹ Oyaro pondeponde ma umo jo, gi mac m'omiyo joparo wor.

⁴⁰ Jokwayo, aka odhiro winyin ma cal lir, aka omiyo jo cemo ma romo wok i polo.

⁴¹ Oyawo got, aka pi onyule, omol i thim paka malawa.

⁴² Kole go opoyo cikirok pere maleŋ, gi ŋeca pere Abraham.

⁴³ Ameno owodho ji pere m'oyerere, aka jowero to jokoko ri kisangala.

⁴⁴ Omiyo jo lowo pa ji man, gi lim pajo je,

⁴⁵ ŋey jowoluwi cik pere, aka jowokuri or pere je. Rwoth wopak!