Zabuli 104 - KITAWO MALEŊ Catholic

Pako jacwec

¹ Pak Rwoth, adundo paran! Rwoth, Were paran idwoŋ! Iruko meni gi dwoŋ;

² lero othokin. Iyaro polo paka wema.

³ Igeto peco perin wi pi ma malo. I oro pondeponde paka cawila perin, aka igweco i bwombi koyo.

⁴ I oro koyo paka jomikwenda perin, gi pilin ma lithkoth paka ŋecin perin.

⁵ Iketho kindi piny m'ocwiny, aka k'oyengere.

⁶ Iketho nam i wiye paka nanga, aka pi oumo gote.

⁷ Munyo ibwoko pi, joringo; joredo kadho munyo jowinjo derino ma mor koth perin.

⁸ Jomol wi gote gi milelo, i kabedo m'icweyo rijo.

⁹ Iketho kew ma jokiripi kalo, igeŋo jo kwoŋ umo piny.

¹⁰ Imiyo waŋ pi mol i milelo, aka malawin joringo i dier tenderin.

¹¹ Jomiyo ogwaŋe madudi pi; kenyo a kama punde madudi jokweyo riyo pajo.

¹² I wi yen macegin gi jo, winyin jogeto od jo aka jowero.

¹³ Idhiro koth i wi tenderin wok i pondeponde, aka piny opoŋ gi silwany perin.

¹⁴ Imiyo lum twi ri dhok, gi cemo ri ji, ŋey jowofur cemo pajo,

¹⁵ wonyak vini ma yomo cuny jo, mo ma fotho waŋ jo, gi mugat ma miyo jo meni.

¹⁶ Yen sida ma Lebanon jolimo pi kweth, yen pa Rwoth ma go won opidho.

¹⁷ Kenyo winyin jogeto od jo; obicin jogeto od gin i wilwindi.

¹⁸ Diegi ceŋ jobedo wi gote, aka ogwaŋe ma ŋungu jopondo i gote.

¹⁹ Icweyo dwe nyutho ndir, aka waŋceŋ oŋeyo sawa pere ma podho.

²⁰ Icweyo mudho, aka ka piny col, ogwaŋe je madudi jowok.

²¹ Simbwore mathindho johola ka jodwaro, jorango cemo wok bongi Were.

²² Ka ceŋ owok, jodok, aka jonindo i od gin.

²³ Ji jokadho i tic pajo, aka jotiyo tundo othieno.

²⁴ Rwoth, tic perin thoth! Icweyo joje i rieko perin; piny opoŋ gi cwec perin.

²⁵ Nam bor, dwoŋ aka lac, gigipiny ma lak jonitie kenyo, gigipiny makwo mathindho gi madongo.

²⁶ Mel jocewere i iye, aka Leviathan m'icweyo tuko i iye.

²⁷ Joje joŋiyo waŋin, imiyo jo cemo pajo i hongo ma ripo.

²⁸ Imiyo jo, aka jocamo, ipoko jo cemo, aka joyeŋ.

²⁹ K'ipano waŋin, jobwok; k'ikwanyo woko luya pajo, jotho, aka jogik i fukefuke ma jowok'iye.

³⁰ To k'imiyo jo cuny perin, jocweyere, imiyo piny kwo manyen.

³¹ Weyi dwoŋ pa Rwoth wobedi cil gi cil; weyi Rwoth wosangala gi gima go, ocweyo!

³² Go ŋiyo piny, aka piny kirin; go geyo gote, aka joŋulo yiro.

³³ Alawero ri Rwoth i kwo paran je; kafodi akwo, alawero ri Were paran pak.

³⁴ Weyi go wosangala gi wer paran, kole afore i Rwoth.

³⁵ Weyi worey joreco wok i piny; aka weyi jokidakana joworweny. Pak Rwoth, adundo paran! Pak Rwoth.