Zabuli 103 - KITAWO MALEŊ Catholic

Mar pa Were

¹ Pak Rwoth, adundo paran! Delkwoŋan gikululu, pak nyingi go maleŋ!

² Adundo paran, pak Rwoth, aka poyi wor pere noknok.

³ Go cwako reco paran je, aka cango two paran je.

⁴ Go botho kwo paran wok i bur, aka miyan silwany gi mar pere makiwire gi wor.

⁵ Go poŋo kwo paran gi gigipiny mabeyo, ŋey akir'ati aka abedi matek paka ango.

⁶ Rwoth thumo banja i thenge pa jom'idiyo, aka timo rijo tiro.

⁷ Go onyutho Musa can pere, to miyo Joisiraili neno tim pere ma meni.

⁸ Rwoth nitie gi wor gi mar, go kimaki nge piyo aka opoŋ gi mar makiwire.

⁹ Go kinen reco mawan hongo je, go kimaki nge cil gi cil.

¹⁰ Go kimiy wan gir'acula paka ripo, kosa kicul wan cungo kwoŋ reco mawan kosa komo mawan.

¹¹ Kole paka polo bor wok i piny, apaka mar pere dwoŋ ri jono ma joworo go.

¹² Paka yuwok ceŋ bor wok yupodho ceŋ, apaka go kwanyo woko reco mawan to tero bor.

¹³ Paka ba nyithindho timo wor ri nyithindho pere, apaka Rwoth timo wor ri jono ma joworo go.

¹⁴ Kole go oŋeyo nger ma wacweyer'iye, go poyo ni wabedo fukefuke.

¹⁵ Paka ri nyatoro, kwo pere cal paka lum, wadongo to wayare paka mawuwa;

¹⁶ kenyo koyo kudho to thwo, to ngoye ŋata onen kendo.

¹⁷ To mar pa Rwoth makiwire bedo cil gi cil, kwoŋ jono ma jolworo go, aka bero pere bedo i luse je,

¹⁸ ri jono ma jokuro cikirok pere, aka jopoyo timo Or pere.

¹⁹ Rwoth oketho kom pere ma dhum i polo; obedo kere kwoŋ gigipiny je.

²⁰ Pak win Rwoth, win jomalaika pere, win ma witek ma wiluwo Or pere, aka wiwinjo wac pere.

²¹ Pak win Rwoth, win meni ma polo, win ŋecin pere, ma witimo mito pere!

²² Pak win Rwoth, win cwec pere je kama go dhum'iye je. Pak Rwoth, adundo paran!