Zabuli 102 - KITAWO MALEŊ Catholic

Kwayo pa soye manitie i teko

¹ Winji kwayo paran, Awi Rwoth, weyi ywak paran wotundi bongin!

² Ikir'ipan ran waŋin i hongo ma kidamba paran, Cik ithin ran, aka idwokan piyo k'alwoŋin!

³ Kole kwo paran rwenyo paka yiro, cokin paran waŋ paka mac.

⁴ Cunyan podho aka thwo paka lum, aka ocile kwoŋ cemo.

⁵ Kwoŋbedo auja malo, adoŋ pien gi cokin.

⁶ Acalo acut madudi, paka tula i gunda m'ojwangere.

⁷ Ariere ma nindo kimaki waŋan wor gipi, acalo winyo manitie kakende i wi ot.

⁸ Ndelo gipi jokwor paran joyetan, jono ma jonyeran jooro nyingan ma kwoŋo ji.

⁹ Kole acamo buru paŋini mugat, aka aruwo pigi waŋan gi math paran.

¹⁰ Kwoŋbedo nge kodi keme perin, kole idiman t'ibolan woko.

¹¹ Kwo paran cal tipo m'othieno, athwo paka lum.

¹² To in, Awi Rwoth, ibedo kere cil gi cil, luse je bino poyo nyingin.

¹³ Ibino ay t'imako wor gi Zayon, hongo otundo ma nyutho go ŋono, me a hongo m'otire.

¹⁴ Kole ŋecin perin jomaro go, makada nende jotieko reyo woko go; jomako gine wor, makada nende odoŋ gunda.

¹⁵ Nonin jobino lworo nyingi Rwoth, aka kerin ma piny jobino lworo meni perin.

¹⁶ Kole Rwoth bino geto Zayon kendo, go bino nenere i dwoŋ pere.

¹⁷ Go bino winjo ji pere m'ojwangi, aka k'ocay kwayo pajo.

¹⁸ Weyi gime wondiki ri luse ma bino, ŋey ji ma fodi k'onywol jowopaki Rwoth.

¹⁹ Rwoth oŋiyo piny wok i kabedo pere maleŋ malo, oŋiyo piny wok i polo.

²⁰ Owinjo kiuja pa jotwec, aka ogonyo jono m'oyido joripo tho;

²¹ ŋey ji jowotuci nyinge i Zayon, aka wopak go i Yerusalem,

²² ka nonin jocokere kanyacel, gi kerin lamo Rwoth.

²³ Rwoth oturo meni paran ma fodi athin, aka oloko kwo paran macek.

²⁴ Awi Rwoth ikir'ikwany woko kwo paran pama, mafodi akitegino. Awi Rwoth in ikwo cil gi cil;

²⁵ Cango con icweyo piny, aka polo obedo tic ma cingin.

²⁶ Jobino rwenyo, to in ibino doŋ, jobino ti paka nangin. Iwiro jo paka nangin, aka jobino rwenyo.

²⁷ To in ikiwire, aka oro perin ongoye gike.

²⁸ Nyithindho pa ŋecin perin jobino bedo i siem, aka ibino kikwonga nyikway jo.