Yowel 2 - KITAWO MALEŊ Catholic

Bonyo paka pir ri ndelo pa Rwoth

¹ Kudhi win gwara i Zayon; koki win gi derino wi got ma leŋo paran! Weyi ji je ma jobedo i Yuda jowokirin, kole ndelo pa Rwoth cegin tundo, orikere.

² Labedo ndelo ma mudho kodi kumo, ndelo ma pondeponde kodi mudho m'opoto! Paka ŋamba m'oyare wi gote, tome bonyo madongo aka jomeni jobino; cal pajo oyido fodi k'obedo wok cene, kendo k'obedi ka jotieko ngoye, i luse gi luse.

³ Mac reyo woko ruwaŋ jo, aka waŋ yuŋey jo. Ruwaŋ jo piny cale ndelo Eden, to yuŋey jo thim m'ojwangi, aka bende ongoye gima budho jo.

⁴ Jocale kayinin, aka joringo paka cwo ma jogweyo kayinin.

⁵ Paka derino pa cawilin, josala wi gote, paka derino pa mac, ma waŋo woko kanja, paka ji ma jomeni m'ocan jo ri lweny.

⁶ Ji jonitie gi bwok swa ruwaŋ jo, nyim dhano je ojowo bondo.

⁷ Joŋweco paka jolweny apondi, joidho kor ot paka cwo ma jolweny, Kisi dhano luwo yo pere, jokiwir yo pajo.

⁸ Ongoye dhano ma kwinyo nyawote, kisi dhano kadho i yo pere; jokadho ka joluwo i gilweny m'ongoye gima juki jo.

⁹ Jokwakere wi tindi madwoŋ, joŋweco wi kor ot; joidho malo wi udi, jodonjo gi dirisa paka jokwo.

¹⁰ Piny kirin ruwaŋ jo, polo yengere. Waŋceŋ kodi dwe jolokere macol, micalin jokimeny.

¹¹ Rwoth miyo dwonde winjere, ruwaŋ jolweny pere. Lwak pere dwoŋ swa, ŋata timo wac pere dwoŋ. Adieri ndelo pa Rwoth dwoŋ, kelo lworo aka ŋa m'ocir ŋa.

Lwoŋo ma ŋuto

¹² Kucel kiri pama, Rwoth waco, dwoki win bongan gi cuny win je, gi riyo kec, gi biyo pigi waŋ win, gi ywak.

¹³ Tur win iy'adundo makiweno yeco nangin mewin. Gik win bongi Rwoth, Were mewin, kole go jakisa aka jawor, galo gi mako nge, aka opoŋ gi mar makiwire, aka jadwoki cunye cen ma timo teko.

¹⁴ Ŋa m'oŋeyo ka go k'owir paro pere, to weyo silwany yuŋeye, mic ma cemo manyinge kodi mic ma medho, ri Rwoth, Were mewin?

¹⁵ Kudhi win gwara i Zayon, loki win riyo kec maleŋ, lwoŋ win cokirok maleŋ.

¹⁶ Coki ji kanyacel, loki cokirok maleŋ, coki jom'otegino; coki nyithindho, kiri nyithindho maŋic ma fodi jodhoth. Weyi jamweha wowey kisika pere, aka mweha wowey tielo pere.

¹⁷ I dier karukirok kodi migam, weyi jocway ri Were i wi migam, jotic pa Rwoth, jowobiy pigi waŋ jo. Weyi jowowaci ni, “Tim ŋono gi ji perin, awi Rwoth, aka ikir'iloki alunja perin giwickwot, gir'awaca i dier nonin. Raŋo wowacere i dier ji ni, Nikune Were pajo?”

Radwok pa Were kodi cikirok

¹⁸ Nyaka to nyeko mako Rwoth ri lowo pere, to bedo gi wor kwoŋ ji pere.

¹⁹ Rwoth odwoko ji pere to waco ama: Kole, ee acegin dhiro riwin, ŋano kodi vini manyen kodi mo manyen, aka wilayeŋ; ak'oloki win kendo, giwickwot i dier nonin.

²⁰ Alakwanyo woko tome bonyo ma yumalo bor gi win, t'agweyo jo woko i piny m'othwo, m'ojwangere, yuwaŋe mere i nam ma yuwok ceŋ; yucen mere i nam ma yupodho ceŋ; topo mere marac kodi ŋwece mere laay malo. Jotieko timo gigipiny madongo!

²¹ Ikir'ilwor, awi piny Yuda; sangala aka fore, kole Rwoth otieko timo gigipiny madongo!

²² Wikiri wilwor, win ogwaŋe madudi, kole lum ma thim jobedo nyaboke pendi; yen jonyak olemo mere, yath makuyu gi yath vini jotieko miyo olemo pajo.

²³ Awi ji ma Zayon, sangala win, aka fore win i Rwoth Were mewin; kole go otieko miyo koth marapena ma botho win, go otieko konjo piny riwin koth, koth marapena gi macowe, i dwe marapena.

²⁴ Kapiedhirok lapoŋ gi ŋano, nywerin lapoŋ to oy gi vini manyen kodi mo manyen.

²⁵ Alaculo win cemo ma oro je, ma tome bonyo otieko camo, jolweny paran madwoŋ, m'adhiro kwoŋ win.

²⁶ Wilacemo to wiyeŋ, to wipako nyingi Rwoth Were mewin, go m'otieko timo gir'aura gi win. Aka wickwot k'omaki ji paran kendo cil gi cil.

²⁷ Aka wilaŋeyo adieri ni, i dier Isiraili, An, kendo an Rwoth, abedo Were mewin aka ongoye man. Wickwot k'omaki ji paran kendo cil gi cil.

Ndelo pa Rwoth

²⁸ Rumacen, alakonjo cuny paran kwoŋ dhano je; wot win kodi nyiki win jolatuco wac Were, cwo mewin ma jotegino jolaleko lek, aka yac mewin jolaneno menyirok.

²⁹ Kiri kwoŋ ŋecin mewin ma cwo kodi ma mon, i hongo no, alakonjo cuny paran.

³⁰ Alanyutho gir'aura i polo kodi i piny, remo kodi mac kodi siro ma yiro.

³¹ Waŋceŋ lalokere mudho, aka dwe lalokere remo, mafodi ndelo pa Rwoth madwoŋ ma kiwacere k'obino.

³² Nyaka kisi ŋat'olwoŋ nyingi Rwoth bino both; kole wi Got Zayon kodi i Yerusalem, labedo gonyirok, paka Rwoth otieko waco, aka kwoŋ joma joboth, labedo jono ma Rwoth lwoŋo jo.