Biblia Todo Logo
Bìoball air-loidhne

- Sanasan -

Yosuwa 9 - KITAWO MALEŊ Catholic


Jogibeon jowondo Yosuwa

1 Munyo kerin je m'oyido jonitie yombo Yordan i piny matendere kodi i piny m'opiele joje yuthengi Nam madwoŋ kadho Lebanon, Johiti, Joamor, Jokanan, Joperiz, Johivi kodi Joyebus, jowinjo gime,

2 jocokere kanyacel gi cuny jo acel lweny gi Yosuwa kodi Isiraili.

3 To munyo jopiny ma Gibeon jowinjo gima Yosuwa oyido otieko timo ri Yeriko kodi Ay,

4 to joridho wondo go. Jokidho to joyiko mic rijo wegi, to jociwo punde pajo gi kutiyin m'ojwer ojwer, piendere ma vini, m'ojwer aka m'oyec to jokwoyo,

5 gi ware m'ojwer aka ogoy'iye kiremo i tiendi jo, gi nangin m'ojwer; aka mic pajo je oyido othwo aka lengalenga.

6 To jokidho bongi Yosuwa i kambi i Gilgal, to jowaco rigo kodi Joisiraili ni, “Wawok i piny mabor; riameno tim gi wan cikirok.”

7 To cwo ma Isiraili jowaco ri Johivi ni, “Kono miti wibedo i dier wan; onyo wanotim gi win cikirok nedi?”

8 Jowaco ri Yosuwa ni, “Wabedo ŋecin perin.” To Yosuwa penjo jo ni, “wijokune? Aka wiwok yukune?”

9 Jodwoko go ni, “Ŋecin perin jowok i piny mabor swa, kwoŋbedo nyingi Rwoth Were perin; kole watieko winjo radwok ma mako kwoŋe, kwoŋ kisi gimoro je ma go otimo i Misir,

10 kodi kwoŋ kisi gimoro je ma go otimo ri kerin ario apa Joamor m'oyido jonitie yombo Yordan, kere Sihon ma Hesibon, kodi kere Og ma Basan m'obedo i Asiteroth.

11 Aka jotel mawan kodi jopiny je ma piny mawan jowaco riwan ni, ‘Kwany win cemo i cingi win ma woth; wikidhi wirom gi jo, aka wiwaci rijo ni, “Wabedo ŋecin perin; biye pama me, tim gi wan cikirok.” ’

12 Me mugat mawan; oyido fodi lieth munyo wakwanyo i udi mawan paka cemo mawan ma woth, i ndelo ma wacak'iye woth bino bongin, t'onyo pama, neni, othwo aka ŋinyere;

13 piendere ma vini me oyido jonyen munyo wapoŋo jo, t'onyo neni, jobare aka nangin me gi ware mawan onyo joti wok kwoŋ woth mabor.”

14 Ameno to cwo no jokwanyo pok pajo, to jobedo ma jok'openjo Rwoth gir'atima.

15 Aka Yosuwa otimo siem gi jo, to timo cikirok gi jo, ma miyo jowokwo; to jotel ma kacokirok jokwoŋere rijo.

16 I gike ma ndelo adek munyo jotieko timo cikirok gi jo, jowinjo ni oyido jobedo joger pajo, aka oyido jobedo i dier jo.

17 To Joisiraili joay malo to jotundo i tindin pajo madongo i ndelo mar'adek. Tindin pajo madongo no oyido jobedo Gibeon, Kepira, Beroth kodi Kiriath Yerim.

18 To Joisiraili jok'oneko jo, rupiri jotel ma kacokirok oyido jotieko kwoŋirok rijo gi Rwoth, Were pa Isiraili. Gikenyo to kacokirok je joŋunyaŋunya kwoŋ jotel.

19 To jotel je jowaco ri kacokirok je ni, “Watieko kwoŋere rijo gi Rwoth, Were pa Isiraili, aka pama onyo wakinyali geyo jo.

20 Walatimo rijo gime, to waweyo jokwo, ka k'obedo ameno to keme bedo kwoŋ wan, kwoŋbedo cikirok ma wakwoŋere rijo.”

21 Jotel to jowaco rijo ni, “Weyi jowokwo.” Ameno to jolokere jobar yen kodi jokulo ri kacokirok je, paka jotel oyido jotieko waco rijo.

22 Yosuwa to lwoŋo joje, to waco rijo ni, “Raŋo wiwondo wan ka wiwaco ni, ‘Wabor swa gi win, munyo wibedo i dier wan?’

23 Onyo pama okwoŋ win, aka jomegi kwoŋ win noknok jolabedo ŋecin, jobar yen gi jokulo ri Ot pa Were paran.”

24 To jodwoko Yosuwa ni, “Rupiri oyido otiek waco ri ŋecin perin iy'adieri ni Rwoth Were perin oyido ooro ŋeca pere Musa miyo lowo je, kodi ma reyo woko joma bedo i piny no je ruwaŋ win; riameno lworo madwoŋ oyido omako ri kwo mawan kwoŋbedo win, to watimo gime.

25 Aka onyo pama, wan ee i cingin: Tim gimaber aka otire rin atima riwan.”

26 Ameno otimo rijo, to gonyo jo wok i cingi Joisiraili aka jok'oneko jo kendo.

27 Yosuwa oloko jo i ndelo no jobar yen kodi jokulo ri cokirok kodi ri migam pa Rwoth, m'omedere tundo i ndelo me, i kabedo me ma go oyer.

Dhopadhola DC Bible © Bible Society of Uganda, 2018.

Bible Society of Uganda
Lean sinn:



Sanasan