Yosuwa 23 - KITAWO MALEŊ Catholic

Yosuwa sewila ji

¹ Rumacen ma hongo malac, munyo Rwoth otieko miyo ywomirok ri Joisiraili kwoŋ jokwor je m'othoko jo, aka Yosuwa oyido oti aka oro pere ojware,

² Yosuwa ocoko Joisiraili je kanyacel, jotel kodi jodongo pajo, jothum banja kodi jotel, to waco rijo ni, “Pama onyo ati aka oro paran ojware;

³ aka witieko neno gimoro je ma Rwoth Were mewin otieko timo ri nonin me je kwoŋbedo win, kole obedo Rwoth Were mewin m'otieko lweny riwin.

⁴ Atieko miyo win paka gir'alunja mewin ri nonin mewin, nonin no ma jodoŋ, kanyacel gi nonin je m'atieko ŋado woko, wok Yordan tundo i Nam Madwoŋ yupodho ceŋ.

⁵ Rwoth Were mewin bino dwoko jo cen ruwaŋ win, to gweyo jo woko i waŋ win; to wiloko lowo pajo mewin, paka Rwoth Were mewin ociko win.

⁶ Riameno bedi win ma wiridhere swa ma kuro kodi timo gimoro je m'ondiki i kitawo ma cik pa Musa, ma wikiwire kwoŋe yuracuc kosa racam,

⁷ ŋey wikiri wiruwere gi nonin me ma jodoŋ ka i dier win, kosa wituci nyingi werin pajo, kosa wikwoŋere gi jo, kosa witiy rijo, kosa wikule piny rijo,

⁸ to cwire win kwoŋ Rwoth Were mewin matek, paka witieko timo tundo konon.

⁹ Kole Rwoth otieko gweyo woko ruwaŋ win nonin madongo kodi matek; paka riwin, ongoye dhano m'onyalo ciro cungo i nyim win tundo konon.

¹⁰ Ŋat'acel kwoŋ win kethere lweny gi ji gana, rupiri obedo Rwoth Were mewin ma lwenyo riwin, paka ociko win.

¹¹ Riameno, gwokere win swa, ma mito Rwoth Were mewin.

¹² Kole ka winowire aŋey, to wiriwere gi jom'oboth pa nonin me ma jodoŋ ka i dier win, to winywomere gi jo, ŋey winywom mon pajo to jonywomere gi win,

¹³ ŋey win adieri ni Rwoth Were mewin k'omedere gweyo nonin me ruwaŋ win; to jolabedo bwo kodi mitego riwin, dende i thenge mewin, kodi kudhin i waŋ win, cuka winosika gi lowo maber me ma Rwoth Were mewin otieko miyo win.”

¹⁴ “Onyo pama acegin kidho i royo ma piny gipi, aka wiŋeyo iy'adundin mewin gi cuny win, wijoje, ni ongoye gima k'otimere kwoŋ gigipiny mabeyo je ma Rwoth Were mewin ociko ma mako win; gimoro je otieko timere riwin, ongoye kad'acel ma k'otimere.

¹⁵ To paka gigipiny je mabeyo ma Rwoth Were mewin ociko ma mako win otieko tundo i kare riwin, onyo Rwoth lakelo kwoŋ win gigipiny mareco je, cuka otiek reyo win woko i lowo maber me ma Rwoth Were mewin otieko miyo win.

¹⁶ Ka winobenga to wituro cikirok pa Rwoth Were mewin, ma go ooro win, to wikadho to witiyo ri werin man to wikule piny rijo, nyaka nge pa Rwoth laliel kwoŋ win, to wisika piyo piyo i lowo maber ma go otieko miyo win.”