Yosuwa 21 - KITAWO MALEŊ Catholic

Tindin madongo apa Jolevi

¹ Jotel pa bacere ma pecin pa Jolevi jocore cegin gi Eliazar jacway ri Were i wi migam kodi Yosuwa wod pa Nun kodi jotel ma pecin ma nonin pa Joisiraili;

² joluwo gi jo i Silo i piny ma Kanan ni, “Rwoth owodho or ka luwo gi bongi Musa ni iripo miyo wan tindin madongo abed'iye, kanyacel gi kakwath pajo ri dhok mawan.”

³ Ameno gi or pa Rwoth, Joisiraili jomiyo Jolevi tindin madongo me gi kakwath wok kwoŋ gir'alunja pajo.

⁴ Kwir ofudhere ri nono pa Kohath. Ameno Jolevi no m'oyido jobedo nyikway Aron jacway ri Were i wi migam jonwaŋo gi kwir wok kwoŋ nono pa Yuda, Simeo kodi Benyamin, tindin madongo apar g'adek.

⁵ Aka nyikway Kohath ma jodoŋ jonwaŋo kodi kwir wok bongi nono pa Isiraili, wok bongi nono pa Dan kodi adec ma nono pa Manase, tindin madongo apar.

⁶ Nyikway Gason jonwaŋo gi kwir wok i nono pa Isakar, wok i nono pa Aser, wok i nono pa Nafital kodi iy'adec ma nono pa Manase i Basan, tindin madongo apar g'adek.

⁷ Nyikway Merari cungo kwoŋ pecin pajo jonwaŋo wok bongi nono pa Ruben, nono pa Gad kodi nono pa Zebulun, tindin madongo apar g'ario.

⁸ Tindin madongo me gi kakwath pajo Joisiraili jomiyo gi kwir ri Jolevi, paka Rwoth oyido otieko wodho or ka luwo gi bongi Musa.

⁹ Wok kwoŋ nono pa Yuda kodi nono pa Simeo, jomiyo tindin madongo me m'otuci gi nyingi jo,

¹⁰ m'okidho ri nyikway Aron, acel kwoŋ nonin pa nyikway Kohath ma jobedo apa Jolevi; paka kwir opodho rijo marapena.

¹¹ Jomiyo jo Kiriath Arba (Arba m'obedo ba Anak) meno Hebron, i piny matendere ma Yuda, kanyacel gi kakwath m'othoko.

¹² To kisawere ma tindi madwoŋ kodi calin mere oyido otiek miyo Kaleb wod pa Yefune paka gipere.

¹³ To nyikway Aron jacway ri Were i wi migam, jomiyo Hebron, tindin madongo ma kapondo pa janek, gi kakwath mere, Libina gi kakwath mere,

¹⁴ Yatir, gi kakwath mere, Esitemowa gi kakwath mere,

¹⁵ Holon gi kakwath mere, Debir gi kakwath mere,

¹⁶ Ayin gi kakwath mere, Yuda gi kakwath mere, Bethsemes gi kakwath mere, tindin madongo abuŋwen wok kwoŋ nonin ario me.

¹⁷ Wok kwoŋ nono pa Benyamin, Gibeon gi kakwath mere, Geba gi kakwath mere,

¹⁸ Anathoth gi kakwath mere, Almon gi kakwath mere, tindin madongo aŋwen.

¹⁹ Tindin madongo apa nyikway Aron, jocway ri Were i wi migam, oyido nitie je tindin madongo apar g'adek gi kakwath pajo.

²⁰ Paka ri nonin pa nyikway Kohath m'odoŋ ma jobedo jopeco pa Kohath mapa Jolevi, tindin madongo m'omiy jo owok kwoŋ nono mapa Isiraili.

²¹ Omiyo Josekem, tindi madwoŋ ma kapondo ri janek, gi kakwath mere i piny matendere ma Isiraili, Gezer gi kakwath mere,

²² Kibzayim kodi Bethhoron gi kakwath pajo, tindin madongo aŋwen.

²³ Aka wok kwoŋ nono pa Dan, jomiyo jo Eliteke kodi Gibethon gi kakwath pajo,

²⁴ Ayijalon kodi Gath Rimon, gi kakwath pajo tindin madongo aŋwen;

²⁵ wok kwoŋ adec ma nono pa Manase, Tanak kodi Gath Rimon, gi kakwath pajo tindin madongo ario.

²⁶ Tindin madongo m'odoŋ apa nonin pa nyikway Kohath oyido je nitie apar gi kakwath pajo.

²⁷ Ri nyikway Gason, acel kwoŋ nonin pa Jolevi, omiy jo wok kwoŋ adec ma nono pa Manase, Golan i Basan gi kakwath mere, tindi madwoŋ ma kapondo ri janek, kodi Bes Tera gi kakwath mere, tindin ario madongo;

²⁸ Aka wok kwoŋ nono pa Isakar, Kison kodi Daberath gi kakwath pajo,

²⁹ Yarmuth kodi Enganim gi kakwath pajo tindin madongo aŋwen;

³⁰ aka wok kwoŋ nono pa Aser, Misal kodi Abidon gi kakwath pajo,

³¹ Helkath kodi Rehob gi kakwath pajo tindin madongo aŋwen;

³² aka wok kwoŋ nono pa Nafital, Kedes i Galili gi kakwath mere, tindi madwoŋ ma kapondo pa janek, Hamothdor kodi Kartan gi kakwath pajo, tindin madongo adek.

³³ Tindin madongo je apa nonin pa Jogason oyido je nitie tindin madongo apar g'adek gi kakwath pajo.

³⁴ Aka ri Jolevi man m'odoŋ, nyikway Merari, omiy jo wok kwoŋ nono pa Zebulun, Yokineam kodi Karta gi kakwath pajo,

³⁵ Dimna kodi Nahalal kodi kakwath pajo, tindin madongo aŋwen;

³⁶ aka wok kwoŋ nono pa Ruben, Beza kodi Yahaz gi kakwath pajo;

³⁷ Kedemoth kodi Mefath kodi kakwath pajo, tindin madongo aŋwen;

³⁸ wok kwoŋ nono pa Gad, Ramoth i Giliad gi kakwath mere, tindi madwoŋ ma kapondo ri janek, Mehanayim gi kakwath mere,

³⁹ Hesibon kodi Yaza gi kakwath pajo, tindin aŋwen madongo je kanyacel.

⁴⁰ Paka ri tindin madongo je apa nyikway Merari, meno, apa nono pa Jolevi ma jodoŋ, meno m'omiy jo je kanyacel oyido obedo tindin madongo apar g'ario.

⁴¹ Tindin madongo je apa Jolevi i dier gim'obedo apa Joisiraili oyido jonitie je kanyacel tindin madongo piero aŋwen g'aboro gi kakwath pajo.

⁴² Tindin madongo me kisi acel oyido nitie gi kakwath mere m'othoko; ameno apaka obedo gi tindin madongo me je.

Isiraili mako lowo je

⁴³ Ama apaka Rwoth omiyo Isiraili lowo je ma go okwoŋere ni lamiyo kwarere; aka munyo jotieko loko apajo, to jobedo kenyo.

⁴⁴ To Rwoth miyo jo ywomirok i kisi thenge paka go oyido otieko kwoŋere ri kwarere pajo; ongoye kad'acel kwoŋ jokwor pajo m'onyalo cungo kwoŋ jo rupiri Rwoth oyido otieko miyo jokwor pajo je i cingi jo.

⁴⁵ Ongoye kad'acel kwoŋ cikirok maber ma Rwoth oyido timo gi ot pa Isiraili ma k'otimere; joje jotimere.