Yosuwa 18 - KITAWO MALEŊ Catholic

Poko lowo m'odoŋ

¹ Onyo to Lwak pa Joisiraili jocokere i Silo, to jojengo Wema ma romo. Jomako lowo m'obedo ruwaŋ jo.

² Oyido fodi odoŋ nonin abirio i dier Joisiraili ma gir'alunja pajo oyido fodi k'opoki.

³ Riameno Yosuwa owaco ri Joisiraili ni, “Kiri keraŋo ma winojala loko lowo ma Rwoth Were pa Kwarere mewin omiyo win?

⁴ Yer ri wiwegi cwo adek wok i kisi nono, aka alaoro jo jowonyal ay malo to jokidho to jowotho i piny paka rom. Jobino tito paka piny nitie i ndiko g'atoŋa ma gir'alunja pajo, nyaka to widwoko bongan.

⁵ Jobino poko i dier jo adec dibirio, Yuda ladoŋ kodi adec pere yupiny, aka ot pa Yozefu joladoŋ kodi adec pajo yumalo.

⁶ Aka wilatito gima mako lowo i pokirok ka dibirio, aka wikel gima winwaŋo bongan ka; aka alabolo kwir riwin ka ruwaŋ Rwoth Were mawan.

⁷ Jolevi jongoye g'adec i dier win, rupiri rapok pajo obedo ma cwayo ri Were i wi migam; aka Gad, Ruben, kodi adec pa Manase jotieko nwaŋo gir'alunja pajo yombo Yordan yuwok ceŋ, ma Musa ŋeca pa Rwoth omiyo jo.”

⁸ Ameno to cwo no joay malo cako woth pajo; Yosuwa to wodho cik ri jono ma jokidho tito lowo i ndiko, ka waco ni, “Kidhi wiwoth i lowo paka rom, aka windiki piny gima makere gi lowo, aka widwoki bongan kendo, aka alabolo kwir riwin ka ruwaŋ Rwoth i Silo.”

⁹ Onyo to cwo no jokidho jowotho i piny; to joketho i ndiko gima makere gi tindin madongo i pokirok ka dibirio; to jobino bongi Yosuwa i kambi i Silo,

¹⁰ Yosuwa to bolo rijo kwir i Silo ruwaŋ Rwoth; to Yosuwa poko Joisiraili lowo kenyo, paka kisi dhano ripo limo.

Adec m'omiy Benyamin

¹¹ Kwir pa nono pa nyikway Benyamin paka pecin pajo nitie to bino malo, aka adec m'omiy go podho i dier nono pa Yuda kodi nono pa Yozefu.

¹² Yuthenge ma yumalo kew pajo ocako i Yordan; onyo to kew medere yu kamaloro ma yumalo ma Yeriko, to idho malo i piny matendere yuthenge ma yupodho ceŋ; to gik yuthim ma Bethaven.

¹³ Wok kenyo to kew luwo gi yupiny yu kam'ocomere gi Luz, yu kamaloro ma Luz (Bethel) kenyo to kew medere piny i Ataroth Adar, wi got ma ŋare yupiny ma tiendi Bethaven.

¹⁴ Kenyo to kew goyo kona to kadho yuthenge man, yuthenge ma yupodho ceŋ ma yupiny wok i got ma ŋare yupiny, ma ŋiyere gi Bethhoron, to gik i Kiriathbal (Kiriath Yerim) tindi madwoŋ m'obedo apa nyikway Yuda. Me nitie yuthenge ma yupodho ceŋ.

¹⁵ Yuthenge ma yupiny cako wok i thengi Kiriath Yerim; to kew medere yupodho ceŋ wok kenyo kiri i waŋ pi ma Nefitowa.

¹⁶ Onyo to kew kadho piny kama got gik'iye ma ŋiyere gi milelo pa wod Hinom, manitie yumalo ma gik milelo pa Refayim; to loro piny ma milelo pa Hinom, yupiny ma kamaloro pa Joyebus, kodi yupiny kamaloro kiri Enrogel;

¹⁷ onyo to gondere yuthenge ma yumalo kadho yu Ensemes, to kadho yu Geliloth, ma ŋiyere kodi kama idho Adumim; kenyo to loro piny i tele pa Bohan wod pa Ruben;

¹⁸ aka luwo yumalo ma kamaloro ma ŋiyere kodi Beth Araba to kadho yupiny i Araba;

¹⁹ kenyo to kew medere yumalo ma kamaloro ma Beth Hogla; to gik i gike ma Nam ma Cumbi, ma yupiny ma gik Yordan.

²⁰ Yordan timo kew mere yuthenge ma yuwok ceŋ. Me obedo gir'alunja pa nyikway Benyamin, cungo kwoŋ pecin mere, kew gi kew thoko.

²¹ Onyo tindin madongo pa Benyamin cungo kwoŋ pecin pajo oyido obedo Yeriko, Beth Hogla, Emek Keziz,

²² Beth Araba, Zemarayim kodi Bethel,

²³ Avim, Para kodi Ofira,

²⁴ Kefar Amon, Ofin, kodi Geba: Tindin madongo apar g'ario gi calin pajo:

²⁵ Gibeon, Rama kodi Beroth,

²⁶ Mizipa, Kefira kodi Moza,

²⁷ Rekem, Iripil kodi Tarala

²⁸ Zela, Helef, Yebus (meno, Yerusalem), Gibeya, kodi Kiriath Yerim: Tindin madongo apar g'aŋwen gi calin pajo. Me obedo gir'alunja pa nyikway Benyamin cungo kwoŋ pecin pajo.