Yosuwa 16 - KITAWO MALEŊ Catholic

Adec m'omiy Efrayim kodi jonono pa Manase ma yupodho ceŋ

¹ Mic pa nyikway Yozefu okadho wok Yordan gi Yeriko, yuwok ceŋ ma pi ma Yeriko, donjo i thim, kidho malo wok Yeriko donjo i piny matendere tundo Bethel;

² kenyo kadho wok Bethel tundo Luz, medere ka luwo gi Ataroth, adec pa Joarka;

³ onyo to kadho piny yupodho ceŋ tundo iy'adec pa Joyafilet, tundo i kew g'adec ma piny ma Bethhoron, wok kenyo to kadho Gezer, to gik i nam.

⁴ Nyikway Yozefu, Manase kodi Efrayim jolimo gir'alunja pajo.

Efrayim

⁵ Adec pa nyikway Efrayim cungo kwoŋ pecin pajo oyido obedo ama: Kew ma gir'alunja pajo yuwok ceŋ obedo Ataroth Adar tundo i kew ma yumalo ma Bethhoron,

⁶ aka kew medere wok kenyo tundo i nam; yumalo obedo Mikmethath; onyo yuwok ceŋ kew goyo kona yuthenge ma Tanath Silo, to luwo yombo go yuwok ceŋ tundo Yanowa,

⁷ onyo to kadho piny wok Yanowa tundo Ataroth kodi Nara, to geyo Yeriko, to gik i Yordan.

⁸ Wok Tapuwa kew kadho yupodho ceŋ i pi ma mol ma Kana, to gik i nam. Meno a nger gir'alunja pa nono pa nyikway Isiraili cungo kwoŋ pecin pajo,

⁹ kanyacel gi tindin madongo m'oyido okethi gicen ri nyikway Efrayim i dier gir'alunja pa nyikway Manase, tindin madongo no je gi calin pajo.

¹⁰ To kad'ameno, jok'ogweyo woko Jokanan ma jobedo i Gezer: Ameno Jokanan jotieko bedo i dier Joefrayim kiri gunyo ni to otiek miyo jo timo tic arom.