Yosuwa 14 - KITAWO MALEŊ Catholic

Poko adec ma yupodho ceŋ ma Yordan

¹ Me a gir'alunja ma Joisiraili jonwaŋo i piny ma Kanan, ma Eliazar jacway ri Were i wi migam, gi Yosuwa wod pa Nun, to jotel ma udi pa bacere ma nonin pa Joisiraili jopoko jo.

² Alunja pajo obedo adec m'omiy paka Rwoth oyido otieko wodho or ri Musa ri nonin abuŋwen g'adec.

³ Rupiri Musa oyido omiyo gir'alunja ri nonin ario g'adec wok i thenge ca ma Yordan; to ri Jolevi go k'omiyo gir'alunja moro i dier jo.

⁴ Rupiri nyikway Yozefu oyido obedo nonin ario, Manase kodi Isiraili, aka ongoye adec m'omiy Jolevi i piny, to kende tindin madongo mar'abed'iye, gi lowo pajo ma kwath ri dhok pajo gi gigipiny pajo.

⁵ Ji ma Isiraili jotimo paka Rwoth owodho cik ri Musa; to jopoko lowo.

Imiyo Hebron ri Kaleb

⁶ Kenyo to nyikway Yuda jobino bongi Yosuwa i Gilgal; to Kaleb wod pa Yefune Jakeniz waco rigo ni, “Iŋeyo gima Rwoth owaco ri Musa dhano pa Were i Kades Barineya ma mako in kodan.

⁷ Oyido ajaoro piero aŋwen munyo Musa ŋeca pa Rwoth odhiran wok i Kades Barineya ma timo nyaliŋliŋ i piny; t'adwoko rigo wac mar'adieri.

⁸ To wutmera ma jokidho malo kodan jomiyo cuny ji kirin; kucel aluwo Rwoth Were paran gi cunyan je.”

⁹ To Musa kwoŋere i ndelo no, ka waco ni, “Adieri lowo ma tiendin otieko nyono bino bedo gir'alunja rin kodi nyithindho perin cil gi cil, rupiri itieko luwo Rwoth Were paran gi cunyin je.

¹⁰ To pama, pak'ineno, Rwoth otieko kuran, paka owaco, oro piero aŋwen me gipi wok i hongo ma Rwoth oluwo wac me ri Musa, kareno Joisiraili oyido fodi jowotho i thim; aka onyo an e konon, ajaoro piero aboro g'abic.

¹¹ Fodi atek pa nyundu konon paka oyido abedo i ndelo no ma Musa odhiran; meni paran rom kodi ma ndino ca, ma lweny, ma kadho kodi ma dwoko.

¹² Onyo riameno miyan piny matendere me ma Rwoth oluwo kwoŋe ndelo no; kole iwinjo i ndelo no paka Joanakim oyido jonitie kenyo, gi tindin madongo m'otinda: Nyalo bedo ni Rwoth labedo kodan, aka alariemo jo woko paka Rwoth owaco.”

¹³ Kenyo to Yosuwa miyo go silwany, to miyo Kaleb Hebron wod pa Yefune mar'alunja.

¹⁴ Riameno Hebron olokere gir'alunja pa Kaleb wod pa Yefune Jakeniz tundo konon, rupiri go oluwo Rwoth, Were pa Isiraili gi cunye je.

¹⁵ Onyo nyingi Hebron macon oyido obedo Kiriath Arba. Arba me am'oyido obedo dhano madwoŋ loyo i dier Joanakim. To piny kwe m'ongoye lweny.