Yosuwa 13 - KITAWO MALEŊ Catholic

Lowo man ma fodi iripo mako

¹ Onyo Yosuwa oyido oti aka oyido ojware i oro; to Rwoth waco rigo ni, “Iti aka ijware i oro, aka fodi lowo nitie kweth ma mitere akwanya to bedo mewin.

² Me a lowo ma fodi odoŋ: Adec je apa Jofilistia, kodi meno je apa Jogesur

³ (wok i Sihor, manitie yuwok ceŋ ma misir, yumalo ma kewere kodi Ekiron, itero ni obedo apa Jokanan; nitie jodhum abic apa Jofilistia, jono ma Gaza, Asdod, Asikelon, Gath, kodi Ekiron) kodi jono ma Avim,

⁴ yupiny, lowo pa Jokanan je, kodi ŋungu m'obedo apa Josidon, tundo Afek, kidho i kew pa Joamor,

⁵ kodi i piny pa Jogebal, gi Lebanon je, yuwok ceŋ, wok i Balgad i tiendi Got Hamon tundo Lebohamath,

⁶ kodi jopiny ma piny matendere wok Lebanon tundo i kam'oŋawere ma pi, kiri gi Josidon je. An won alariemo woko jo ruwaŋ Joisiraili; nyaka poki ri Joisiraili paka gir'alunja paka atieko miyin or.

⁷ Riameno pok lowo me paka alunja ri nonin abuŋwen kodi adec ma nono pa Manase.”

Poko adec ma yuwok ceŋ ma Yordan

⁸ Adec man ca ma nono pa Manase, nono pa Ruben kodi nono pa Gad jonwaŋo gir'alunja pajo ma Musa oyido otieko miyo jo, yombo Yordan yuwok ceŋ, paka Musa ŋeca pa Rwoth omiyo jo:

⁹ Wok Arower, manitie i thengi milelo ma Arinon, kodi tindi madwoŋ manitie i dier milelo, kodi kam'opiele je ma Medeba tundo kiri Dibon,

¹⁰ kodi tindin pa Sihon madongo je kere pa Joamor, m'odhumo i Hesibon, tundo kiri i kew pa Joamon;

¹¹ kodi Giliad g'adec pa Jogesur kodi apa Jomakath, gi Got Hamon je, gi Basan je tundo i Salaka;

¹² kerin pa Og je i Basan, m'odhumo i Asiteroth kodi i Edirey (go kende am'owey kwoŋ jom'oboth ma Refayim) me Musa oyido okengila to gweyo woko.

¹³ Kucel Joisiraili jok'ogweyo woko Jogesur kosa Jomakath; to Gesur kodi Makath jotieko bedo i dier Joisiraili tundo gunyo ni.

¹⁴ To nono pa Jolevi kende ama Musa k'omiyo gir'alunja; mic m'otimi gi mac ri Rwoth Were pa Isiraili am'obedo gir'alunja pajo, paka owaco rigo.

Adec m'omiy Ruben

¹⁵ Musa omiyo gir'alunja ri nono pa nyikway Ruben paka nonin pajo nitie.

¹⁶ Adec m'oyido obedo apajo oyido cako wok Arower, m'oyido nitie i thengi milelo ma Arinon, kodi tindi manitie i dier milelo, gi lowo m'opiele je macegin kodi Medeba;

¹⁷ gi Hesibon, kodi tindin mere madongo je ma jonitie kam'opiele; Dibon, kodi Bamoth Bal, kodi Beth Bal Meyon,

¹⁸ gi Yahaz kodi Kedemoth, gi Mefath,

¹⁹ gi Kiriath Yerim kodi Sibima, gi Zereth Sahar i wi tendere ma milelo,

²⁰ gi Beth Pewor, kodi kamaloro ma Pisiga, gi Bethyesimoth,

²¹ nyaka ni tindin madongo je ma kam'opiele, kodi ker pa Sihon je kere pa Joamor, m'odhumo i Hesibon, ma Musa okengila gi jotel ma Midian, Evi, Rekem, Zur, Hur kodi Reba paka wot kerin pa Sihon, ma jobedo i piny.

²² Balam, wod pa Bewor, jathieth, Joisiraili joneko g'abor i dier ji pajo man m'oneki.

²³ Kam'oyido poko nyikway Ruben oyido obedo Yordan paka kew. Me oyido obedo gir'alunja pa nyikway Ruben, cungo kwoŋ pecin pajo gi tindin madongo pajo kodi calin.

Adec m'omiy Gad

²⁴ Musa bende omiyo gir'alunja ri nono pa Gad, ri nyikway Gad cungo kwoŋ pecin pajo.

²⁵ Adec pajo oyido obedo Yaza kodi tindin madongo je ma Giliad, kodi adec ma lowo pa Joamon, tundo Arower, manitie yuwok ceŋ ma Raba,

²⁶ aka wok Hesibon tundo Ramath Mizipa kodi Betonim, aka wok Mahanayim tundo iy'adec ma Lodebar,

²⁷ aka i milelo Beth Haram, Beth Nimra, Sukoth kodi Zafon, ker m'odoŋ je apa kere Sihon kere ma Hesibon, Yordan kodi kew mere, yu gike ma yupiny ma Nam Kinereth, yuwok ceŋ yombo Yordan.

²⁸ Me a gir'alunja pa nyikway Gad cungo kwoŋ nonin pajo, gi tindin pajo madongo gi calin pajo.

Adec m'omiy jonono pa Manase ma yuwok ceŋ

²⁹ Musa omiyo alunja ri adec nono pa Manase; omiy adec nyikway Manase, cungo kwoŋ pecin pajo.

³⁰ Adec pajo otele wok Manahayim, thoko Basan je, ker pa kere Og ma Basan parom, kodi calin je ma Yayir ma jonitie i Basan, tindin madongo piero aucel,

³¹ g'adec Giliad, kodi Asiteroth, gi Edirey, tindin madongo ma ker pa Og i Basan; me omiy nyikway Makir wod pa Manase cungo kwoŋ nonin pajo ri adec pa Makir.

³² Me gir'alunja ma Musa opoko i kam'opiele ma Mowab, yombo Yordan yuwok ceŋ ma Yeriko.

³³ To ri nono pa Jolevi, Musa k'omiyo gir'alunja moro; Rwoth Were pa Isiraili am'obedo gir'alunja pajo, paka go oyido otieko luwo gi jo.