Yosuwa 1 - KITAWO MALEŊ Catholic

Were oro Yosuwa kikengila Kanan

¹ Munyo Musa ŋeca pa Rwoth otieko tho, Rwoth oluwo gi Yosuwa wod pa Nun, jakony pa Musa, ka waco ni,

² “Ŋeca paran Musa otieko tho. Pama kidhi iŋadi Malawa Yordan, in kodi ji me je, i piny ma miyo nyithindho pa Isiraili.

³ Kisi kamoro ma par tiendin ogey atieko miyin, paka atieko ciko Musa.

⁴ Wok i thim kodi Lebanon tundo kiri i malawa madwoŋ; malawa Yufrete, lowo pa Johiti, tundo i Nam Madwoŋ yupodho ceŋ bino bedo adec mewin.

⁵ Ongoye dhano ma lakikengila in hongo je ma kwo perin. Paka oyido anitie gi Musa apaka bende alabedo kodin; ak'oredhin kosa ak'ojwangin.

⁶ Bedi m'icwiny kendo jamisen; kole ilatelo ji me mako lowo m'akwoŋere ri kwarere pajo ni alamiyo jo.

⁷ Bedi nyaka m'icwiny aka jamisen swa, k'igwokere tic gi cik je paka ŋeca paran Musa oorin; ikir'iwire kwoŋe yuracuc kosa racam, ŋey wonyali kadho rin maber kisi kamoro je m'inokidh'iye.

⁸ Kitawo ma cik me wokiri woeye i dhokin; ifonjere kwoŋe odieceŋ gi wor, ŋey inyal gwokirok timo paka ondiki kisi gimoro je manitie i iye. Nyaka kenyo ilaloko yo perin maber, aka lakadho kodin maber.

⁹ Pama onyo amiyin or: Bedi m'icwiny kendo jamisen; ikir'ikirini kosa ibwoki, kole Rwoth Were perin nitie kodin kisi kamoro je m'ikidh'iye.”

Yikirok ma monjo

¹⁰ Kenyo Yosuwa ooro jotel pa ji,

¹¹ luwo gi lwak ka jowaco rijo ni: “Yik win gima winitie gine; kole i ndelo adek wilaŋado Yordan, donjo kidho mako lowo ma Rwoth Were mewin miyo win ni wobedi mewin.”

¹² Ri jonono pa Ruben, jonono pa Gad, kodi adec nono pa Manase, Yosuwa owaco ni:

¹³ “Poyi win wac ma Musa ŋeca pa Rwoth ooro win ka waco ni, ‘Rwoth Were mewin miyo win kabedo ma ywomirok, aka lamiyo win lowo me.’

¹⁴ Mon mewin, nyithindho mewin, kodi mwendi mewin bino doŋ i lowo ma Musa omiyo win yombo Yordan. To jolweny je ma jonitie i dier win jolaŋado ma jotiŋo gilweny pajo konyo wade mewin,

¹⁵ cuka Rwoth omiy ywomirok ri wade mewin kanyacel gi win, to bende joloko lowo ma Rwoth Were mewin miyo jo apajo. Nyaka to wigik i lowo mewin won to wilunjo, lowo ma Musa ŋeca pa Rwoth omiyo win yombo Yordan yuwok ceŋ.”

¹⁶ Jodwoko Yosuwa ni: “Gimoro je m'itieko oro wan walatimo, aka kisi kam'ior'iye wan walakidho.

¹⁷ Paka waworo Musa i gimoro je, apaka bende walaworin. Kwanyo woko kende weyi Rwoth Were perin wobedi kodin, paka cango obedo gi Musa!

¹⁸ Ŋat'ogwenyere kwoŋ cik perin to cayo wac perin, or moro je m'inowodhi, ibino neko. Bedi kende m'icwiny kendo jamisen.”